Nashik News : लोहोणेर गावानजीक गिरणा नदीपात्रातून खुलेआम वाळूचा उपसा सुरू आहे. महसूल यंत्रणेच्या एका अधिकाऱ्याच्या मेहरबानीमुळे मोठ्या प्रमाणावर वाळूची तस्करी सुरू असून रोज रात्री उशिरापर्यंत हजारो ब्रास वाळू उपसा होत आहे. या वाळू तस्करीकडे संबंधित अधिकारी जाणीवपूर्वक दुर्लक्ष करीत आहेत. (Illegal sand mining is going on from Lohoner Girna river bed)

या वाळू तस्करीतून मोठी माया जमा होत असल्याने स्थानिक वाळू तस्करासह बाहेरगावाहून या ठिकाणी वाळू तस्कर येत असल्याने अवैध वाळू उपसा जोरदार सुरू आहे. ही वाळू तस्करी कोणाच्या मेहरबानी खाली सुरू आहे असा प्रश्न लोहोणेर येथील ग्रामपंचायतीचे माजी सरपंच दीपक बच्छाव व ग्रामस्थांनी केला आहे.

लोहोणेर येथील गिरणा नदीपात्रातून अवैध वाळू चोरी मोठ्या प्रमाणावर फोफावली आहे, याकडे तलाठी, मंडल अधिकारी यांचे लक्ष का जात नाही असा प्रश्न नागरिकांना पडला आहे. दिवसेंदिवस वाळू तस्करांच्या संख्येत मोठ्या प्रमाणावर वाढ होत आहे. (latest marathi news)

दररोज बिनबोभाटपणे वाळू उचलली जात असून लाखो रुपयांचा महसूल बुडत आहे. अधिकाऱ्यांच्या दुर्लक्षामुळे वाळू तस्कराची हिंमत वाढली आहे. पहाटेपर्यत गिरणा नदी पात्रातून मोठ्या प्रमाणावर अवैध वाळूचे ट्रॅक्टर जाताना दिसतात.

रात्रीच्या अंधारात ट्रॅक्टरच्या साह्याय्याने वाळू उपसा करण्यात येत आहे. यामुळे गिरणा नदीपात्रात असलेल्या सर्व पाणीयोजना धोक्यात आल्या असून पाण्याची पातळी खाली गेली आहे. भविष्यात मोठ्या प्रमाणावर जलसंकट निर्माण होण्याची शक्यता आहे. संबंधित अधिकारीच जबाबदार आहेत असा आरोप बच्छाव यांनी केला आहे.