Nashik News : इंदिरानगर परिसरात ठिकठिकाणी कचऱ्याचे ब्लॅक स्पॉट तयार झाले असून पावसाळ्याच्या पार्श्वभूमीवर कचऱ्यामुळे साथीचे रोग बळविण्याचे शक्यता निर्माण झाली आहे. इंदिरानगर येथील पेठेनगर, कमोदनगर, पाटील गार्डन, एकता कॉलनी, राजीवनगर, संताजीनगर, श्रद्धा विहार, पांडवनगरी, कानिफनाथनगर, चेतनानगर, राणेनगर परिसरात कचरा वाढला असून, यामुळे परिसरात दुर्गंधी पसरली आहे. साथींच्या आजाराला एकप्रकारे आमंत्रण दिले जात आहे. (Indiranagar black spots of garbage )

पेठेनगर - चार्वाक चौक मार्गावरील नळे मळ्याजवळ परिसरातील, खाद्यपदार्थ, भाजीपाला, विक्रेत्यांकडून टाकाऊ पदार्थ, प्लॅस्टिक, फर्निचरचे टाकाऊ मटेरिअल रस्त्याजवळ टाकण्याचा प्रकार गेल्या अनेक दिवसांपासून सुरू झाला आहे. सध्या या भागात कचऱ्याचे ढीग तयार झाले असून यातील काही कचरा कुजला आहे. यामुळे परिसरात दुर्गंधी पसरल्याने परिसरातील नागरिकांना व रस्त्याने जाणाऱ्या प्रवाशांना त्याचा त्रास सहन करावा लागत आहे. एकता कॉलनी भागात चर्चजवळ एका खासगी मिळकतीत मोठ्या प्रमाणात टाकाऊ कचरा सातत्याने टाकण्यात येतो. त्यामुळे परिसरात दुर्गंधी पसरली आहे.

पावसामुळे कचरा कुजत आहे. महानगरपालिकेने कचरा वाहतुकीची व त्याची योग्य विल्हेवाट लावण्याची अद्ययावत यंत्रणा आहे. मोठ्या प्रमाणात मनुष्यबळ कार्यरत असताना परिसरातील सर्व कॉलनी परिसरात कचरा दिसून येतो. पाथर्डी फाटा ते मुंबई नाका भागात महामार्गाच्या दोन्ही बाजूला सर्विस रस्ते आहेत. उड्डाणपुलाखाली मोठी झाडे लावण्यात आली आहेत. काही नागरिक या झाडांमध्येदेखील सर्रास कचरा टाकतात. त्यामुळे तेथूनदेखील आता दुर्गंधी पसरण्यास सुरवात झाली आहे. (latest marathi news)

कारवाईची मागणी

संपूर्ण परिसरात आरोग्य विभागाने स्वच्छता मोहीम राबविण्याची मागणी शिवसेना ठाकरे पक्षातर्फे करण्यात आली आहे. स्वच्छतेसाठी महापालिकेकडून प्रबोधनही केले जाते. परंतु कचरा टाकणारे याकडे पाठ फिरवून रात्री रस्त्यालगत कचरा टाकण्याचा प्रकार करतात. असे करणाऱ्या नागरिकांची महापालिका प्रशासनाने त्वरित दखल घेत कारवाई केली पाहिजे.

हा कचरा त्वरित स्वच्छ करावा अन्यथा शिवसेनेकडून सर्व कचरा गोळा करून आयुक्तांच्या दालनात टाकण्यात येईल, असा इशारा उपमहानगरप्रमुख नीलेश साळुंखे, आकाश काळे, शाखाप्रमुख साईनाथ घुले, योगराज गायकवाड, रवी अर्धापूर, मोहन हिवाळे, दिनेश थोरात, सविता भावसार, ज्योती अंभोरे, शैला दोरगे, विकास गवई आदींनी दिला आहे.