कळवण : आदिवासी मुले व मुलींच्या निवासी शासकीय आश्रमशाळेतील विद्यार्थ्यांसाठी देण्यात येणाऱ्या जेवणात अळ्या निघाल्याचा धक्कादायक प्रकार खर्डेदिगर येथील शासकीय आश्रमशाळेमध्ये उघडकीस आला. यामुळे विद्यार्थ्यांमध्ये मोठी खळबळ उडाली आहे. (Larvae found in students food in Government Ashram School)

याप्रकरणी जागृत पालकांनी तक्रार केली असून शासकीय आश्रमशाळेतील विद्यार्थ्यांच्या जेवणापासून शिक्षणाच्या ज्ञानदान करणाऱ्या वर्गखोल्याशेजारील दुर्गंधी, पिण्याच्या पाण्यासह अनेक समस्यांकडे तक्रार करत लक्ष वेधले आहे. याप्रकरणी आमदार नितीन पवार यांनी आदिवासी आयुक्त कार्यालयासह आदिवासी विभागाला या प्रकरणी चौकशी करून कार्यवाहीच्या सूचना केल्या आहेत.

शासकीय आश्रमशाळा व वसतिगृहातील विद्यार्थ्यांना उच्च दर्जाचा परिपूर्ण आहार देण्याचा कार्यक्रम शासकीय स्तरावर राबविला जात असताना कळवण तालुक्यात निकृष्ट आहार आदिवासी विद्यार्थ्यांना पुरवला जात असल्याबद्दल आमदार पवार यांनी नाराजी व्यक्त केली आहे.

आदिवासी विकास विभाग प्रशासनाचे लक्ष वेधत तालुक्याच्या आदिवासी दुर्गम आणि अतिदुर्गम खर्डेदिगर भागात सर्वसुविधांयुक्त शासकीय आश्रमशाळा व वसतिगृह इमारतीची माजी आदिवासी विकासमंत्री स्व. ए. टी. पवार यांनी उभारणी करून आदिवासी भागात शासकीय आश्रमशाळा, वसतिगृह आणि शिक्षणाचे जाळे पसरवले. (latest marathi news)

मात्र शासकीय यंत्रणेकडून आदिवासी विद्यार्थ्यांच्या शिक्षण व अन्न, वस्र, निवारा व सुविधांची हेळसांड होत असल्याच्या तक्रारी आमदार पवार यांना प्राप्त झाल्यानंतर त्यांनी नाराजी व्यक्त करीत शासकीय व अनुदानित आश्रमशाळा व वसतिगृहांतील विद्यार्थी सुविधांबाबत चौकशीच्या आदिवासी आयुक्त कार्यालयाला सूचना केल्या.

दुर्गंधीचाही विद्यार्थ्यांना त्रास

खर्डेदिगर शासकीय आश्रमशाळेतील विद्यार्थ्यांना जेवण निकृष्ट मिळत असून अन्नात अळ्या आढळल्या, शौचालयात पाणी नसल्याने बाहेर नैसर्गिक विधीसाठी जावे लागते, आश्रमशाळेला टँकरद्वारे पाणी पुरवठा होतो, विद्यार्थ्यांच्या वर्गखोलीशेजारी शौचालय असल्यामुळे दुर्गंधीचा त्रास विद्यार्थ्यांना होत असल्याच्या तक्रारी पालकांनी केल्या आहेत.