Nashik News : कालव्यालगत शनिवारी (ता. २६) सकाळी स्त्री जातीचे जिवंत अर्भक आढळून आल्याने एकच खळबळ उडाली आहे. हे जिवंत अर्भक पोलिसांच्या मदतीने जिल्हा रुग्णालयात औषधोपचारासाठी दाखल करण्यात आले आहे. कालव्याच्या रस्त्याने मजूर जात असताना परिसरातील महाविद्यालयाजवळ रस्त्यावर सिमेंट गोणीवर नवजात जिवंत अर्भक दिसले. (live female infant was found)

अर्भक जिवंत असल्याने मजुराने पोलिसांना माहिती दिली, त्यानंतर रुग्णवाहिकेला पाचारण करून त्या अर्भकाला जिल्हा रुग्णालयात दाखल करण्यात आल्याची माहिती पंचवटी पोलिसांनी दिली आहे. याबाबत अधिक माहिती अशी की, सीताराम तुळशीराम पवार हे मिस्तरी काम करून आपली उपजीविका करतात.

शनिवारी सकाळी कामावर जात होते. सकाळी साडेसातच्या सुमारास डावा तट कालव्यालगत झाडाखाली बाळाच्या रडण्याचा आवाज ऐकू आला. सीताराम यांनी जाऊन बघितले असता एक अर्भक आढळून आले. (latest marathi news)

ही बाब तत्काळ पोलिसांना कळविली. पंचवटी निर्भया मोबाईल पथकाने घटनास्थळी धाव घेतली. प्रथमदर्शनी सदर अर्भक एक स्त्री जातीचे लक्षात आले. ते भुकेने व्याकूळ होऊन रडत असल्याचे समजले.

विशेष म्हणजे या भुकेने व्याकूळ असलेल्या अर्भकास महिला अंमलदार हिने स्वतःचे स्तनपान देऊ केले व ऊब निर्माण केली आणि पुढील उपचारार्थ शासकीय रुग्णालयात दाखल करण्यात आले. याप्रकरणी अज्ञाताविरुद्ध पंचवटी पोलिस ठाण्यात गुन्हा दाखल करण्यात आला असून अधिक तपास पोलिस करीत आहेत.