Nashik News : दिंडोरी आणि नाशिक लोकसभा मतदारसंघाच्या महायुतीच्या उमेदवारांनी गुरुवारी (ता. २) उमेदवारी अर्ज दाखल करण्यासाठी काढलेल्या रॅलीदरम्यान शिवसेना (शिंदे गट) व शिवसेना (उद्धव बाळासाहेब ठाकरे गट) एकमेकांसमोर आली. त्या वेळी शिवसेना ठाकरे गटाच्या पदाधिकाऱ्यांनी ठाकरे गटाचे चिन्ह असलेल्या मशाली पेटवून जोरदार घोषणाबाजी केली. (Nashik Lok Sabha Constituency)

तर शिंदे शिवसेनेनेही त्यास घोषणांतून प्रत्युत्तर देण्याचा या वेळी प्रयत्न केला. नाशिक मतदारसंघातील शिवसेना शिंदे गटाचे उमेदवार खासदार हेमंत गोडसे आणि दिंडोरीतील भारतीय जनता पक्षाच्या उमेदवार डॉ. भारती पवार यांनी गुरुवारी उमेदवारी अर्ज दाखल केले. अर्ज दाखल करण्यापूर्वी त्यांनी शहरातील बी. डी. भालेकर शाळेपासून कार्यकर्त्यांची रॅली काढली.

ही रॅली शालिमार येथील शिवसेना ठाकरे गटाच्या कार्यालयाजवळ आली असता दोन्ही गटांचे कार्यकर्ते एकमेकांसमोर आले. त्यामुळे चांगलाच गोंधळ उडाला. शिंदे गटाचे उमेदवार आणि कार्यकर्ते शालिमार येथे आले असता, शिवसेना ठाकरे गटाच्या पदाधिकाऱ्यांनी ठाकरे गटाचे चिन्ह असलेल्या मशाली पेटवून हातात घेत, जोरदार घोषणा दिल्या. (Latest Marathi News)

‘हम सब खुद्दार बाकी सब गद्दार’ अशा घोषणा देत शिवसेना ठाकरे गटाच्या कार्यकर्त्यांनी उमेदवार गोडसे यांना हिनविण्याचा प्रयत्न केला. शिंदे शिवसेनेकडून नाशिकचा खासदार कसा पाहिजे, त्या वेळी ठाकरे गटाने राजाभाऊ वाजेंसारखा पाहिजे, अशी घोषणा देत प्रत्युत्तर दिले. त्यानंतर दहा ते पंधरा मिनिटे दोन्ही गटांतील कार्यकर्त्यांची जोरदार घोषणाबाजी सुरू होती.

त्यामुळे ही रॅली ठाकरे गटाच्या कार्यालयापासून पुढे जाईपर्यंत पोलिसांची सातत्याने धावपळ सुरू होती. या वेळी कोणताही अनुचित प्रकार घडू नये, यासाठी पोलिसांनी चोख पोलिस बंदोबस्त ठेवला होता. अचानक झालेल्या या प्रकाराने शिंदे गटातील कार्यकर्त्यांची चांगलीच धावपळ उडाली. यावेळी ठाकरे गटाचे बाळासाहेब कोकणे, ऋषी वर्मा, संजय परदेशी. इमरान तांबोळी, फहिम शेख, राजू वाकसरे, सुनील गोडसे आदी पदाधिकारी उपस्थित होते.