Nashik Lok Sabha Constituency : दिंडोरी लोकसभा मतदारसंघात महाविकास आघाडीत बिघाडी होण्याची शक्यता आहे. आघाडीतील घटक पक्ष मार्क्सवादी कम्युनिस्ट पक्षाने उमेदवारी मागितली. न मिळाल्यास निवडणुकीच्या रिंगणात उतरण्याचा निर्धार केला आहे. दुसरीकडे भारतीय जनता पक्षाचे माजी खासदार हरिश्‍चंद्र चव्हाण अपक्ष उमेदवारीवर ठाम असल्याने महायुतीचीही डोकेदुखी वाढली. (nashik lok sabha Constituency Chavan insists on independent candidate in Dindori marathi news )

दिंडोरी लोकसभा मतदारसंघात भाजपकडून पुन्हा एकदा विद्यमान खासदार डॉ. भारती पवार यांना उमेदवारी जाहीर करण्यात आली आहे. त्यांच्याविरोधात राष्ट्रवादी काँग्रेस शरद पवार गटाकडून भास्कर भगरे यांना निवडणुकीच्या रिंगणात उतरविण्यात आले आहे. महाविकास आघाडीच्या मुंबईत झालेल्या पत्रकार परिषदेत माकप आघाडीबरोबर असल्याचे जाहीर करण्यात आले होते. मात्र, आता माकपचे माजी आमदार जे. पी. गावित हे दिंडोरीतून लोकसभा निवडणूक लढविण्यावर ठाम आहेत. (latest marathi news)

त्यांनी शुक्रवारी (ता. १९) दिंडोरीत पक्षाचा मेळावा घेतला. यात आघाडीने हा मतदारसंघ माकपला सोडावा, अशी मागणी करणारा ठराव केला. आघाडीने मित्रपक्षाचा विचार न केल्यास माकप उमेदवार निवडणूक लढविणार असल्याचे त्यांनी या वेळी स्पष्ट केले. त्यामुळे दिंडोरीत महाविकास आघाडीत बिघाडी होण्याच्या मार्गावर आहे. गावित यांच्या भूमिकेमुळे आघाडीचे उमेदवार भगरे यांच्या अडचणी वाढतील. महाविकास आघाडीपाठोपाठ महायुतीची डोकेदुखी वाढली आहे.

भाजपचे माजी खासदार चव्हाण यांनीही अपक्ष उमेदवारी करणार असल्याचे जाहीर करीत, त्यावर ठाम राहणार असल्याचे सांगितले. तसेच, चव्हाण यांनी कळवण येथे डॉ. भारती पवार यांच्यावर टीकास्त्र सोडत पाच वर्षांत माझी आठवण झाली नाही, आता अडचणीत आल्यावरच माझी आठवण झाली का, असा सवाल केला. त्यामुळे महायुतीपुढेही पेच निर्माण होण्याची शक्यता आहे. गावित व चव्हाण यांच्या भूमिकेमुळे दिंडोरी लोकसभा मतदारसंघात चौरंगी लढत होऊ शकते.