Nashik News : आमदार गोपीचंद पडळकर यांनी राज्याचे अन्न व नागरी पुरवठामंत्री छगन भुजबळ यांची त्यांच्या निवासस्थानी भेट घेतली. छगन भुजबळ महायुतीतील सर्वांत महत्त्वाचे घटक असून, त्यांच्या नेतृत्वाखाली ओबीसी चळवळ वाढत असल्याचा दावा त्यांनी केला. नाशिक लोकसभा मतदारसंघासाठी राष्ट्रवादी काँग्रेसतर्फे छगन भुजबळ यांचे नाव समोर आले होते. ( MLA Gopichand Padalkar met Chhagan Bhujbal)

परंतु भुजबळ यांचे नाव चर्चेत आल्यानंतरही उमेदवारी जाहीर होत नसल्याने अखेर त्यांनीच पत्रकार परिषद घेऊन माघार घेतली होती. अर्ज दाखल करण्याच्या एक दिवस आधी शिवसेनेच्या शिंदे गटाचे हेमंत गोडसे यांना उमेदवारी जाहीर करण्यात आली. त्यानंतर महायुती म्हणून असा प्रचार दिसून आला नाही.

भाजपचे प्रदेशाध्यक्ष चंद्रशेखर बावनकुळे, ग्रामविकासमंत्री गिरीश महाजन, पालकमंत्री दादा भुसे, दिंडोरीच्या महायुतीच्या उमेदवार डॉ. भारती पवार, महायुतीचे उमेदवार हेमंत गोडसे आदींनी भुजबळ यांची भेट घेतली. (latest marathi news)

रविवारी (ता. १२) भाजपचे आमदार गोपीचंद पडळकर यांनी सकाळी भुजबळ यांची भेट घेतली. श्री. पडळकर म्हणाले, की नाशिकमध्ये धनगर समाजाचा कौटुंबिक स्नेहमेळावा होता, यानिमित्त नाशिकमध्ये आलो होतो, महायुतीचे ज्येष्ठ नेते छगन भुजबळ आमचे नेते आहेत. नाशिकमध्ये आल्यानंतर त्यांना भेटलं पाहिजे या निरपेक्ष भावनेतून ही भेट झाली.

छगन भुजबळ यांना कोणीही डॉमिनेट करू शकत नाही. महाराष्ट्रातील ओबीसींची मोठी ताकद त्यांच्या पाठीशी आहे. स्वतः भुजबळ यांनीच मी निवडणूक लढणार नाही, अशी स्पष्ट भूमिका घेतली होती. त्यामुळे ओबीसींची ताकद जी होती तीच आज आहे.