Nashik Lok Sabha Constituency : लोकसभेचा नाशिक मतदारसंघ पांरपरिक पध्दतीने शिवसेनाच लढणार असून विद्यमान खासदार हेमंत गोडसे यांनाच पुन्हा उमेदवारी मिळेल असे सांगतानाच शिवसेनेच्या शिंदे गटाचे सचिव भाऊसाहेब चौधरी यांनी छगन भुजबळ यांना उमेदवारी मिळाल्यास शिवसैनिक काम करणार नसल्याचा दावा केल्यानंतर महायुतीत बेबनाव निर्माण झाला आहे. (Nashik Lok Sabha Constituency Shiv Sainik will not do work of Bhujbal marathi news)

दिवसभराच्या चर्चेनंतर नाशिकच्या जागेवरून महायुतीतील वाढत्या तणावाच्या पार्श्‍वभूमीवर चौधरी यांनी यु-टर्न घेत, शिवसैनिक काम करणार नाही असे मला वाटते असे मत मांडल्याचा खुलासा केला. नाशिक लोकसभा मतदारसंघाचा तिढा अद्यापही सुटलेला नाही. कल्याण लोकसभेच्या जागेवर देवेंद्र फडणवीस यांनीच डॉ. श्रीकांत शिंदे यांची उमेदवारी जाहीर केली. त्यानंतर तातडीने नाशिकचा प्रश्न सुटणे अपेक्षित होते.

मात्र नाशिकच्या जागेचा तिढा दिवसेंदिवस अधिकच वाढताना दिसत आहे. यापूर्वी शिवसेनेच्या शिंदे गटाने या जागेवर दावा करताना हेमंत गोडसे यांना उमेदवारी मिळेल असे जाहीर केले होते. परंतु त्यानंतर त्याच्या प्रतिक्रिया उमटल्या. भाजपने देखील नाशिकच्या जागेवर दावा केला. तर छगन भुजबळ यांनी नाशिक जिल्ह्यात राष्ट्रवादी काँग्रेसचे पाच आमदार असल्याने नाशिकच्या जागेवर दावा केला.  (nashik political news )

त्यानंतर अचानक भुजबळ यांच्या नावाची चर्चा सुरू झाली. नाशिकची जागा राष्ट्रवादी काँग्रेस पक्षाला दिली जाणार असून राजकारणाचा ‘माधव' पॅटर्न रुजविण्यासाठी भुजबळ यांनाच नाशिक मधून उमेदवारी दिली जाणार असल्याची चर्चा सुरू झाली. भुजबळ यांचेदेखील नाव अद्यापपर्यंत जाहीर झाले नाही. दुसरीकडे शिवसेनेच्या शिंदे गटाने देखील नाशिकचा दावा सोडलेला नाही.

गोडसे यांनाच उमेदवारी

उबाठा गटाचे ज्येष्ठ नेते बबन घोलप यांनी आज शिंदे गटात प्रवेश केला. त्या पार्श्वभूमीवर आज सकाळी शिवसेनेचे सचिव भाऊसाहेब चौधरी नाशिकमध्ये आले होते. यावेळी त्यांनी नाशिकच्या जागेवर दावा केला. ते म्हणाले, हेमंत गोडसे यांनी सलग दोनदा छगन भुजबळ व समीर भुजबळ यांना पराभूत केले आहे. शिवसैनिकांनी त्यांच्या विरोधात प्रचार केला आहे.

त्यामुळे भुजबळ यांना उमेदवारी मिळाल्यास शिवसैनिक भुजबळांच्या प्रचाराला येतील असे आम्हाला वाटत नाही. त्यामुळे नाशिकची जागा शिवसेनेला मिळायला हवी असा दावा केला. डॉ. श्रीकांत शिंदे यांच्याप्रमाणे नाशिकमधून गोडसे यांची उमेदवारी एक -दोन दिवसात जाहीर होईल. घोलप यांच्या प्रवेशानंतर उबाठा गटाचे दहा ते बारा माजी नगरसेवक शिवसेनेत येणार असल्याचा दावा त्यांनी केला.