Nashik Lok Sabha Election : लोकसभेच्या निवडणुकीत प्रामुख्याने विधानसभा मतदारसंघनिहाय कुणाला किती आघाडी मिळाली, यावर त्या भागातील विद्यमान आमदारांचा प्रभाव निश्चित होतो. युती वा आघाडीच्या संबंधित उमेदवारास किती मते मिळवून दिली, याचेही परीक्षण या निकालावेळी होणार आहे. त्यामुळे निकाल लोकसभेचा असला तरी विद्यमान आमदार आणि काही प्रबळ इच्छुकांची आतापासूनच धाकधूक वाढली आहे. ( MLA fear increases due to result of lok sabha election on 4 june )

आपल्या मतदारसंघातून दिलेल्या मताधिक्यावर त्यांची विधानसभेची उमेदवारी ठरणार असते, त्यामुळे उमेदवाराबरोबरच आमदार आणि इच्छुकांमध्ये वेगळीच भीती पाहायला मिळत आहे. दिंडोरी लोकसभा निवडणुकीत महायुती आणि महाविकास आघाडीच्या उमेदवारांसोबत आमदारांची पण परीक्षा होणार असल्याच्या चर्चा रंगत आहेत. मताधिक्य देण्यात आमदार कमी पडल्यास विधानसभेवेळी त्याचा विचार केला जाऊ शकतो, असे बोलले जात आहे.

काहींच्या मते लोकसभा निवडणुकीतील मुद्दे व विधानसभा निवडणुकीतील गणिते वेगळी असू शकतात. त्यामुळे थेट असा निकष लावणे घाईघाईचे ठरेल. मात्र असे असले तरी या निवडणुकीतील मतांच्या संख्येवर पुढील गणिते मांडली जाणार, हे मात्र नक्की! दिंडोरी मतदारसंघात कळवण- सुरगाणा, येवला, निफाड, दिंडोरी- पेठ या चार विधानसभा मतदारसंघात अजित पवार गटांचे आमदार आहेत. (latest political news)

तर नांदगाव गटात शिवसेना शिंदे गटांचे आमदार व चांदवड- देवळा मतदारसंघात एकमेव भाजपचे आमदार आहेत. सुहास कांदे, नितीन पवार, डॉ. राहुल आहेर, छगन भुजबळ, दिलीप बनकर, नरहरी झिरवाळ हे सर्व सत्ताधारी आमदार असून, महायुतीचे घटक आहेत आणि डॉ. भारती पवार या महायुतीच्या उमेदवार असून, त्यांना निवडून आणण्यासाठी या आमदारांनी केलेले प्रयत्न मताधिक्यात परिवर्तित होणार की नाही, याकडेही लक्ष लागून आहे. त्यामुळे हा लोकसभेचा निकाल आमदारांसाठीही चिंतेचा विषय असणार आहे.

दिंडोरी लोकसभेतील विधानसभानिहाय मतदान

नांदगाव : ३,३२,५१२ १,९३,६५७ (५८.२४ टक्के)

कळवण-सुरगाणा : २,९४,००० २,०८,४२० (७०.८९ टक्के)

चांदवड-देवळा : २,९९,३०४ १,९९,४९७ (६६.६५ टक्के)

येवला : ३,१४,५५१ २,०५,६६९ (६०.१३ टक्के)

निफाड : २,९१,४५९ १,८७,४२५ (६४.३१ टक्के)

दिंडोरी-पेठ : ३,२१,५५८ २,४२,५१२ (७५.४२ टक्के)