Nashik News : महाराष्ट्राची चेरापुंजी तसेच पावसाचे माहेरघर असणाऱ्या तालुक्याच्या पश्चिम घाट पट्टयासह कसारा घाट परिसरात सलग तीन दिवसांपासून पावसाची संततधार सुरू असून गेल्या २४ तासांत १०० मिलीमीटरपेक्षा जास्त पावसाची नोंद झाली आहे. (More than 100 mm of rain in 24 hours in Igatpuri)

तालुक्याच्या विविध भागात गेल्या दोन-तीन दिवसांपासून होणाऱ्या पावसामुळे शेतकरी वर्गात समाधान असून पावसाबरोबर दाट प्रमाणात धुकेही आल्याने सर्वाधिक वर्दळीचा मुंबई-आग्रा महामार्गसुद्धा मंगळवारी (ता.२) मंदावल्याचे चित्र होते. तालुक्याच्या विविध भागात शेतीला तलवाचे स्वरूप प्राप्त झाले आहे. तसेच संततधार पावसामुळे दोन्ही शहराच्या विविध भागांत पाणी तुंबले असून सगळीकडे पाणीच पाणी दिसून येत आहे.

दरम्यान मुसळधार पावसाची धार तुटत नसल्यामुळे धरणांच्या पातळीत समाधानकारक वाढ झाली आहे. या दमदार पावसामुळे तालुक्यातील भाम, भावली, दारणा नद्यांसह छोटे-मोठे ओहोळ व तलाव ओसंडून वाहत आहेत. तर इतर धरणांच्या पाणलोट क्षेत्रात समाधानकारक वाढ झाल्याची नोंद झाली आहे.

जिकडे तिकडे पाणीच पाणी

तालुक्यातील अति पावसाच्या भागात पावसाने पुन्हा मुसंडी मारली आहे. घाटमाथ्यावरील इगतपुरी, शहर व परिसरासह कसारा घाट व पश्चिम पट्ट्यातील भावली, मानवेढे, बोर्ली, पिंपरी सदो, नांदगाव सदो, घोटी, देवळे, टाकेघोटी, कावनई, कारावाडी, अवळखेड, काराचीवाडी, वाकी, भरवज, निरपण, काळुस्ते, चिंचलेखैरे तसेच पूर्व भागातील गोंदे. (latest marathi news)

पाडळी देशमुख, अस्वली मुकणे, जानोरी, मुंढेगाव, नांदगाव, वाडीवऱ्हे, सांजेगाव, म्हसुर्ली, आहुर्ली, वैतरणा, टाकेद, साकूर, शेणीत माणिकखांब, देवळे, खैरगाव, आंबेवाडी इंदोरे, वासाळी, खेड, बेलगाव तऱ्हाळे, धामणगाव, तळेगाव, बलायदुरी, पारदेवी, त्रिंगलवाडी व आदी भागांत व पूर्व भागातील मानवेढे, काळूस्ते, वैतारणा पट्टयात जोराचा पाऊस असल्याने या परिसरातील शेतांमध्ये पाणीच पाणी झाल्याचे चित्र आहे. पावसामुळे भात लागवडीला वेग येणार आहे.

धरणांच्या पाणलोट क्षेत्रात

२४ तासात झालेला पाऊस

धरण क्षेत्र : आजचा पाऊस : एकूण पाऊस (मिमि)

दारणा : ४५ : २०७

मुकणे : ३२ : १८९

वाकी : ७२ : ३२५

भाम : ७६ : २७१

भावली : १०० : ४९९

वालदेवी : ३७ : १३३

गंगापूर : ३० : २०३

कश्यपी : ५५ : १७९