नाशिक : नवरात्रोत्सवाला गुरुवारपासून प्रारंभ झाला असून, त्या पार्श्वभूमीवर शहराच्या उपनगरांमध्ये मंडळांकडून रासदांडियाचे आयोजन करण्यात आलेले आहे. मात्र, पोलिसांच्या आदेशाला झुगारून शुक्रवारी (ता. ४) रात्री दहा वाजेनंतर बहुतांशी मंडळांच्या रासदांडियात डीजेचा दणदणाट सुरू होता. यातून आयोजकांचा मनमानीपणा निदर्शनास आला. नवरात्रोत्सवात गरबा-रासदांडिया खेळण्यासाठी युवा वर्गांसह महिलांमध्ये मोठा उत्साह असतो. (Disobeying orders and making noise even after 10 pm of dandiya Organisers )

तर पोलीसांनी नवरात्रोत्सव सुरू होण्यापूर्वीच मंडळ व गरबा-रासदांडियांचे आयोजन करणार्यांना नियमांचे पालन करण्याचे आवाहन केले होते. त्यानुसार रात्री दहा वाजता रासदांडिया बंद करणे आवश्यक होते. परंतु नवरात्रोत्सवाच्या पहिल्या दिवशी रासदांडिया खेळण्यासाठी फारशी गर्दी नव्हती. परंतु दुसर्या माळीला (ता.४) रात्री आठ वाजेपासून गरबा-रासदांडिया खेळण्यासाठी गर्दी होऊ लागली.

पोलिसांनी दिलेल्या आदेशानुसार रात्री दहा वाजेपर्यंत वाद्य वाजविण्यास परवानगी होती. असे असतानाही उपनगरीय परिसरातील बहुतांशी रासदांडियाच्या ठिकाणी रात्री साडेदहा ते अकरा वाजेपर्यंत डीजेचा दणदणाट सुरू होता. या सुरू असलेल्या रासदांडियाच्या आयोजकांना पोलिसांकडून कोणतीही तंबी देण्यात न आल्याचे आश्चर्य जागरुक नागरिकांनी व्यक्त केले.