Nashik NCP Bhavan : राष्ट्रवादी काँग्रेस पक्षात फूट पडल्यानंतर शरद पवार आणि अजित पवार असे दोन गट पडले आहेत. दोन्ही गटांकडून पक्ष, चिन्ह आणि कार्यालयांवर आपला हक्क सांगितला जात आहे.

याच पार्श्वभूमीवर शहरातील राष्ट्रवादी काँग्रेस भवन कार्यालयास बॅरिकेडिंगचा वेढा करण्यात आला आहे. त्याकडे बघून नेमका प्रवेश कुणास, असा प्रश्न नागरिकांसह पक्षाच्या कार्यकर्त्यांना पडला आहे. (Nashik NCP Bhavan office surrounded by barricading political)

राजकारणात काही दिवसांपूर्वी दुसरा मोठा भूकंप होऊन राष्ट्रवादी काँग्रेस पक्षात फूट पडली आहे. शरद पवार आणि अजित पवार अशा दोन गटांत राष्ट्रवादी काँग्रेस पक्ष विभागला गेला आहे. सर्व राजकीय वातावरण ढवळून निघाले आहे.

अशात दोन्ही गटांच्या पदाधिकाऱ्यांकडून पक्ष, चिन्ह आणि कार्यालयांवर आपला दावा सांगितला जात आहे. काही दिवसांपूर्वी शहरातील राष्ट्रवादी भवनाचा ताबा दोन्ही गटांच्या पदाधिकाऱ्यांकडून घेण्यात आला होता.

दोन्ही गट एकमेकांच्या समोर आल्याने मोठा तणाव निर्माण झाला होता. या वेळी गटातील प्रत्येक जण आपल्याच गटाचा दावा कार्यालयावर सांगत होता. तणाव वाढत असल्याने पोलिसांनी मध्यस्थी करत पदाधिकाऱ्यांची समजूत काढली.

हेही वाचा : Credit Card फसवणूक....काय घ्याल काळजी?

पुढेही कायदा सुव्यवस्थेचा प्रश्न निर्माण होऊ नये, यानिमित्ताने भवनाबाहेर बॅरिकेडिंग करण्यात आले आहे. कार्यालयाच्या दर्शनी भागात संपूर्ण बॅरिकेडिंग लावण्यात आल्याने जणू कार्यालयास बॅरिकेडिंगचा वेढा पडला आहे, असे दिसून येत आहे.

सध्या कार्यकर्ते, पदाधिकाऱ्यांचीही गर्दी कमी झाल्याने कार्यालयाचे प्रवेशद्वारही बंद दिसून येत आहे.

लावलेले बॅरिकेडिंग पाहून सामान्य नागरिक आणि दोन्ही गटांच्या पदाधिकारी, कार्यकर्त्यांना प्रश्न पडला आहे, की नेमके हे बॅरिकेडिंग कुणासाठी आहे. कुणास आत प्रवेश नाही, की अन्य कुठले कारण आहे.

तर काहींना कारण कुठलीही असू देत, कार्यालयास असलेला बॅरिकेडिंगचा वेढा पदाधिकारी, कार्यकर्त्यांमध्ये संभ्रम निर्माण करणारा ठरत आहे.

कार्यकर्ते आणि पदाधिकाऱ्यांकडून गजबजून जाणाऱ्या कार्यालयात गेल्या काही दिवसांपासून शुकशुकाट पसरला आहे. कार्यालयबाहेरची बॅरिकेडिंग आणखी त्यात भर टाकत आहे.