लासलगाव : येथील कृषी उत्पन्न बाजार समितीत शुक्रवारच्या तुलनेत उन्हाळ कांद्याच्या दरात क्विंटलमागे ७०० ते ८०० रुपयांची वाढ झाली. त्यामुळे शेतकऱ्यांमध्ये समाधानाचे वातावरण आहे. शुक्रवारी (ता. ३) लासलगाव बाजार समितीत उन्हाळ कांदा कमीत कमी ७०० रुपये, जास्तीत जास्त १८०१ रुपये, तर सरासरी १५५१ रुपये दर होता. (Onion increased by Rs 800 in Lasalgaon market committee)

निर्यातबंदी उठवल्यानंतर उन्हाळ कांद्याला कमीत कमी ८०१ रुपये, जास्तीत जास्त २५५१, तर सरासरी भाव २१०० रुपये दर होता.

"निर्यात बंदीचा निर्णय मागे घेतला असला तरी त्यावर ४० टक्के निर्यात शुल्क लावलेले आहे आणि ५५० डॉलर निर्यात शुल्क असल्यामुळे प्रत्यक्षात शेतकऱ्यांना त्याचा काहीच फायदा होणार नाही. एकप्रकारे अघोषित निर्यातबंदीच आहे. शासनाने ४० टक्के निर्यात शुल्क व एमईपी तत्काळ रद्द करून शेतकऱ्यांना दिलासा द्यावा." - प्रवीण कदम, कांदा निर्यातदार, लासलगाव (Latest Marathi News)

"महाराष्ट्रातील कांदा उत्पादक क्षेत्र असलेला उत्तर महाराष्ट्र तसेच पश्‍चिम महाराष्ट्र लोकसभा मतदारसंघातील महायुतीच्या उमेदवारांना फटका बसू नये, यासाठी अखेर कांदा निर्यातबंदी उठवण्याचा निर्णय घेतला आहे. या निर्णयामुळे कांदा उत्पादक शेतकऱ्यांचे या दरम्यान कोट्यवधी रुपयांचे नुकसान झाले आहे. त्यामुळे शेतकरी आपल्या निर्णयावर ठाम राहणार आहे." - जयदत्त होळकर, माजी सभापती, लासलगाव बाजार समिती

"वाणिज्य मंत्रालयाच्या वतीने कांदा निर्यातबंदी उठवण्याच्या निर्णयामुळे कांद्याच्या बाजारभावात ८०० रुपयांची मोठी वाढ झाली. २ हजार रुपयांच्या आतील दर २५०० रुपयांच्या वर गेल्याने नक्कीच याचा शेतकऱ्यांना फायदा होतो." - सुवर्णा जगताप, पदाधिकारी, भाजप महिला आघाडी