Nashik News : नॅशनल इलिजिब्‍लिटी कम एट्रान्‍स टेस्‍ट (नीट) यूजी- २०२४ या परीक्षेसंदर्भातील तपशिलवार माहिती नॅशनल टेस्टिंग एजन्‍सीने (एनटीए) शनिवारी (ता. २०) संकेतस्‍थळावर जाहीर केली. सुनावणीदरम्‍यान न्‍यायालयाने दिलेल्‍या आदेशानुसार तपशील जाहीर केला असून, यातून रंजक माहिती समोर आली आहे. (Only 5 Students Reached 700 in NEET exam)

नाशिक जिल्ह्यातील २० केंद्रांतून दहा हजार ९०९ विद्यार्थ्यांनी परीक्षा दिली असली, तरी यापैकी अवघे पाचच विद्यार्थी गुणांबाबत सातशेपार पोहचू शकले आहेत. बिहारसह उत्तर प्रदेशातील काही राज्‍यांमध्ये ‘नीट’चा पेपर फुटल्याचे प्रकरण समोर आल्‍यानंतर अनेक विद्यार्थ्यांनी न्‍यायालयात धाव घेत दाद मागितली होती.

न्‍यायालयात ‘नीट’ परीक्षेसंदर्भात सुनावणी सुरू असून, नुकत्याच झालेल्‍या सुनावणीदरम्‍यान सर्व शहरनिहाय परीक्षा केंद्रांचा तपशील जाहीर करण्याचे आदेश न्‍यायालयाने ‘एनटीए’ला दिले होते. मात्र ही माहिती जाहीर करताना विद्यार्थ्यांची ओळख प्रदर्शित होणार नाही, याची खबरदारी घेण्याबाबतदेखील बजावले होते.

त्‍यानुसार ‘एनटीए’ने अनुक्रमांक व त्‍यासमोर संबंधित विद्यार्थ्याला मिळालेले गुण प्रदर्शित केले आहेत. नाशिक शहरासह जिल्‍हाभरात २० परीक्षा केंद्रांवर ही परीक्षा झाली होती. या केंद्रांवर एकूण दहा हजार ९०९ विद्यार्थ्यांनी परीक्षा दिल्‍याचे आकडेवारीतून समोर येत आहे. परंतु या विद्यार्थ्यांमध्ये अवघ्या पाच विद्यार्थ्यांनी सातशे किंवा त्‍यापेक्षा जास्‍त गुण मिळविताना राष्ट्रीय स्‍तरावर डंका वाजविला आहे. (latest marathi news)

७१५ गुणांचा नाशिकचा ‘हायस्‍ट’

सातशे किंवा त्‍यापेक्षा अधिक गुण मिळविणाऱ्या विद्यार्थ्यांपैकी एका विद्यार्थ्याने सर्वाधिक ७१५ गुण मिळविले आहेत. पंचवटी परीसरातील क. का. वाघ कृषी महाविद्यालय परीक्षा केंद्रावर परीक्षा दिलेल्‍या विद्यार्थ्याने ही कामगिरी केली आहे.

९१ विद्यार्थ्यांना उणे गुण

‘नीट’ दिलेल्‍या दहा हजारांहून अधिक विद्यार्थ्यांपैकी काही पठ्ठ्यांना शून्‍याचा आकडादेखील ओलांडता आलेला नाही. या परीक्षेत ‘निगेटिव्‍ह मार्किंग’ असल्‍याने बहुतांश उत्तरे चुकीची देणाऱ्या ९१ विद्यार्थ्यांना उणे (निगेटिव्‍ह) अर्थात, शून्‍यापेक्षा कमी गुण मिळाले आहेत.