Nashik Police Combing : शहर पोलीस आयुक्तालयाच्या परिमंडळ दोन अंतर्गत गुन्हेगारीविरोधात कोबिंग ऑपरेशन राबविण्यात आले.

कोबिंगदरम्यान रेकॉर्डवरील ६५ गुन्हेगारांची चौकशी करण्यात आली तर, ५० टवाळखोरांविरोधात कारवाई करण्यात आली आहे. (Nashik Police Combing Nashik Road Ambad Satpur Police Combing Action against 50 defectors)

पोलीस आयुक्त अंकुश शिंदे यांच्या आदेशानुसार, दिवाळीच्या पार्श्वभूमीवर परिमंडळ दोनमध्ये पोलीस उपायुक्त मोनिका राऊत यांच्या नेतृत्वाखाली गुन्हेगारांविरोधात अचानक कोंबिंग ऑपरेशन राबविले.

नाशिकरोड, उपनगर, देवळाली कॅम्प, इंदिरानगर, अंबड आणि सातपूर पोलिस ठाण्याच्या हद्दीत गुरूवारी (ता.९) पहाटेपर्यंत कोंबिंग आॅपरेशन सुरू होते.

यावेळी पोलिसांनी पोलीस ठाण्याच्या हद्दीतील रेकॉर्डवरील १३५ गुन्हेगारांची तपासणी केली असता, ६५ गुन्हेगारांची चौकशी करून त्यांची आवश्यक ती माहिती घेऊन कारवाई करण्यात आली.

तसेच, यावेळी पोलिसांनी ५० टवाळखोरी करणार्यांविरोधात प्रतिबंधात्मक कारवाई करण्यात आली आहे. त्याचप्रमाणे, अंबड आणि देवळाली कॅम्प पोलीस ठाण्याच्या हद्दीतील ८ जणांविरोधात कोटपा अन्वये सार्वजनिक ठिकाणी धुम्रपान केल्याप्रकरणी गुन्हा दाखल करण्यात आला आहे.

शहरात सराईत गुन्हेगार, तडीपार गुंड गावठी कट्टे व धारदार हत्यारे बाळगून वावरताना आढळून येत आहेत. त्यामुळे आयुक्त अंकुश शिंदे यांच्या आदेशाने गुन्हेगारांविरोधात अचानक कोंबिंग, ऑलआऊटची कारवाई करीत आयुक्तालय हद्दीमध्ये नाकाबंदी करण्यात येत आहे.

सातपूर व अंबड एमआयडीसीमध्ये फिक्सपॉईंट बंदोबस्त व गस्ती वाढविण्यात आली आहे. सदरील कोंम्बिंगमध्ये उपायुक्त मोनिका राऊत, सहायक आयुक्त शेखर देशमुख, आनंदा वाघ यांच्यासह पोलीस ठाण्याचे अधिकारी, कर्मचारी सहभागी झाले होते.