Nashik Police : येत्या सोमवारपासून (ता. ५ ऑगस्ट) श्रावण मासाला प्रारंभ होतो आहे. श्रावणमासात शहरातील महादेव मंदिरांमध्ये गर्दी होत असते. त्यामुळे शहर पोलिसांकडून वाहतूक नियोजनाची आखणी सुरू आहेत. त्याचप्रमाणे, त्र्यंबकेश्वर येथेही भाविकांची गर्दी होत असते. बहुतांशी भाविक नाशिक - त्र्यंबकरोडनेच जात असल्याने शहर व ग्रामीण पोलिसांकडून त्या दृष्टीकोनातून नियोजनाची आखणी केली जात आहे. (Nashik Police Preparedness of city rural police for Shravan month)

नाशिक शहरातील गंगाघाटावरील श्री कपालेश्वर मंदिर आणि त्र्यंबकेश्वर येथील बारा ज्योर्तिलिंगापैकी एक असलेले त्र्यंबकराजा मंदिर याठिकाणी लाखो भाविकांची श्रावण महिन्यात गर्दी होत असते. यासंदर्भात पोलिस अधीक्षक विक्रम देशमाने यांनी आढावा बैठक घेत महत्त्वपूर्ण सूचना दिल्या आहेत.

तर, शहर पोलिस आयुक्त संदीप कर्णिक यांनीही पंचवटी, गंगापूर पोलिस ठाण्यासह पोलीस अधिकार्यांसमवेत शहरातील महादेव मंदिराचा आढावा घेतला आहे. गंगा घाटावरील श्री कपालेश्वर मंदिर, गंगापूर रोडवरील सोमेश्वर मंदिर याठिकाणी गर्दी होत असल्याने या परिसरात वाहनतळे, वाहतूक मार्गात बदल यासंदर्भातील कार्यवाहीच्या सूचना केल्या आहेत. (latest marathi news)

ब्रह्मगिरी फेरी

त्र्यंबकेश्वर येथे श्रावणातील तिसऱ्या सोमवारी ब्रह्मगिरी प्रदक्षिणा फेरीसाठी लाखो भाविकांची गर्दी होत असते. त्यासाठी नाशिक शहरातील जुने सीबीएस येथून त्र्यंबकेश्वरसाठी शेकडो बसेस मार्गस्थ होतात. या पार्श्वभूमीवर १८ ते २० ऑगस्ट यादरम्यान, शहरातील वाहतूक मार्गात बदल केला जाणार आहे. तसेच, त्र्यंबकेश्वरकडे जाणार्या खासगी वाहनांसाठी संत गजानन महाराज मंदिराजवळील मोकळ्या जागेत पार्किंगची व्यवस्था करण्यासंदर्भात ग्रामीण पोलीसांचे नियोजन आहे.

कडेकोट बंदोबस्त

दरम्यान, येत्या रविवारी (ता.४ ऑगस्ट) गटारी अमावस्या आहे. त्यामुळे शहर व ग्रामीण पोलीसांकडून शनिवारपासूनच (ता. ३) कडेकोट बंदोबस्ताचे नियोजन केले आहे. मद्यपींकडून वाहने चालवून अपघाताच्या घटना घडू नये यासाठी पोलिसांकडून ड्रंक ॲण्ड ड्राईव्हची कारवाई केली जाणार आहे, तशा सूचना आयुक्तांनी केल्या आहेत.