Nashik News : महाराष्ट्र नवनिर्माण सेनेचे अध्यक्ष राज ठाकरे हे दोन दिवसांच्या नाशिक दौऱ्यावर येत असून दौऱ्याच्या निमित्ताने त्र्यंबकेश्वर येथून निघणाऱ्या आषाढी वारीत सहभागी वारकऱ्यांची संवाद साधणार आहेत. या माध्यमातून ठाकरे यांच्याकडून विधानसभा निवडणुकीच्या नारळ फोडला जाण्याची चर्चा सुरू आहे. (Raj Thackeray on 2 day visit to Nashik)

मनसे अध्यक्ष राज ठाकरे यांच्याबरोबर युवा नेते अमित ठाकरेदेखील दौऱ्यात सहभागी होणार आहे. बुधवारी (ता. १९) संध्याकाळी सहा वाजता त्यांचे आगमन होईल गुरुवारी (ता. २०) त्र्यंबकेश्वर येथे दर्शन घेतील. त्यानंतर संत निवृत्तीनाथ महाराज पालखी सोहळ्याला भेट देणार आहेत. त्यापूर्वी संतश्रेष्ठ निवृत्तीनाथ महाराजांच्या समाधीचे दर्शन घेतील.

लोकसभा निवडणुकीमध्ये राज ठाकरे यांनी पंतप्रधान नरेंद्र मोदी यांच्यासाठी महायुतीला बिनशर्त पाठिंबा दिला. आता ऑक्टोबर महिन्यात विधानसभेची निवडणूक होणार आहे. (latest marathi news)

या निवडणुकीत महाराष्ट्र नवनिर्माण सेनेकडून ‘एकला चलो रे‘ ची भूमिका घेण्यात आली असून जवळपास दोनशे जागा लढण्याचे निश्चित झाले आहे.

या निवडणुकीच्या प्रचाराचा भाग म्हणूनच राज ठाकरे यांच्याकडून सहकुटुंब श्री त्र्यंबकेश्वराचे दर्शन त्यानंतर संतश्रेष्ठ निवृत्तीनाथ महाराज समाधीचे दर्शन घेऊन वारकऱ्यांची संवाद साधला जाणार आहे.