वावी : दूध उत्पादक शेतकऱ्यांच्या प्रश्नांवर चर्चा करण्यासाठी स्वाभिमानी शेतकरी संघटनेचे संस्थापक माजी खासदार राजू शेट्टी यांच्या उपस्थितीत येत्या मंगळवारी दिनांक 2 जुलै दुपारी चार वाजता सिन्नर तालुक्यातील वावी येथे दूध परिषदेचे आयोजन करण्यात आले आहे. (Nashik Raju Shetty in presence of milk council on Tuesday)

सरकारकडून शेतकऱ्यांना न्याय मिळवून देण्यासाठी दि. १ जुलै रोजी कृषी दिनाचे औचित्य साधून माजी खासदार शेट्टी शेतकरी कर्जमुक्ती अभियानाची सुरुवात करणार आहे. हरितक्रांतीचे प्रणेते राज्याचे माजी मुख्यमंत्री वसंतराव नाईक यांच्या जन्मस्थळी अभिवादन करून यवतमाळ पुसद येथून हे अभियान सुरू होणार आहे.

दि. 2 जुलै रोजी सकाळी अहमदनगर जिल्ह्यातील राहुरी येथे शेट्टी यांच्या उपस्थितीत शेतकऱ्यांच्या प्रश्नांवर रस्ता रोको केला जाणार आहे. त्याच दिवशी सायंकाळी सिन्नर तालुक्यातील वावी येथे नाशिक जिल्ह्यातील दूध उत्पादक शेतकऱ्यांच्या मेळाव्यास श्री शेट्टी संबोधित करतील.

गायीच्या दुधाला प्रति लिटर किमान चाळीस रुपये दर मिळावा शासनाने दूध उत्पादक शेतकऱ्यांना देऊ केलेल्या पाच रुपये अनुदानात वाढ करून ते सात रुपये प्रति लिटर करावे, पशुखाद्य किमतीवर नियंत्रण आणून पशुपालकांना योग्य दरात पशुखाद्य उपलब्ध करून द्यावे, दूध शीतकरण केंद्रांना औद्योगिक दरात वीज पुरवठा करावा, दूध उत्पादक शेतकरी पशुधनाचा शासनाने मोफत विमा काढावा, दूध उत्पादक शेतकऱ्यांना दुग्ध व्यवसायासाठी राष्ट्रीय बँकांकडून विनातारण कर्ज मिळावे या मागण्या दूध उत्पादक शेतकऱ्यांच्या आहेत. शेट्टी यांच्या उपस्थितीत होणाऱ्या विविध परिषदेत या मागण्यांकडे शासनाचे लक्ष वेधले जाणार आहे. (latest marathi news)

स्वाभिमान पक्षाचे प्रदेशाध्यक्ष प्रा. जालंदर पाटील, स्वाभिमानी शेतकरी संघटनेचे प्रदेशाध्यक्ष संदीप जगताप, नाशिक जिल्हाध्यक्ष निवृत्ती गारे यांची या दूध परिषदेत प्रमुख उपस्थिती असणार आहे. नाशिक जिल्ह्यातील पशुपालक, दूध उत्पादक शेतकरी, दुग्धविकास संस्था प्रतिनिधींनी वावी ता. सिन्नर येथील महात्मा ज्योतिबा फुले सभागृहात आयोजित केलेल्या परिषदेस उपस्थित राहावे, असे आवाहन स्वाभिमानी शेतकरी संघटनेचे सिन्नर तालुका अध्यक्ष आत्माराम पगार, स्वाभिमानी युवा आघाडीचे जिल्हाध्यक्ष तथा सिन्नर बाजार समितीचे संचालक श्रीकृष्ण घुमरे, पाथरेचे माजी सरपंच मच्छिंद्र चिने, सिन्नर बाजार समितीचे माजी सभापती डॉ. रवींद्र पवार, संदीप शिंदे, डॉ. दिलीप सोनवणे आदींनी केले आहे.