शेवटच्या दिवशी मिळेल चान्स!

नाशिक लोकसभा निवडणुकीसाठी २६ एप्रिलपासून अर्ज भरण्यास सुरवात झाली आहे. महाविकास आघाडीच्या उमेदवाराने प्रचारात आघाडी घेतली आहे. सोमवारी (ता. २९) उमेदवारी अर्जही सादर करणार आहे. सोशल मीडियावरून तसा संदेश व्हायरल केला गेला आहे.

‘मविआ’च्या उमेदवारानेही आपण उमेदवारी अर्ज भरणार असल्याचा संदेश सर्वांच्या मोबाईलवर पाठविला. तसा तो महायुती समर्थक कार्यकर्त्यांच्याही मोबाईलवर पोचला. त्याने तो संदेश वाचला आणि त्यास राग अनावरच झाला.

त्याच्यासोबतच्या कार्यकर्त्यांना तो म्हणाला, ‘‘पाहा यांनी आता आपल्यालाही मेसेज पाठविला आहे. जसं काय आपल्याला उमेदवार नाही, म्हणून आपण आता त्यांचा अर्ज भरायला त्यांच्यात सहभागी व्हायचंय. काही वाटतं का?’’ तसाच मेसेज दुसऱ्याच्याही मोबाईलवर आला.

तोही म्हणाला, ‘‘गड्या आपल्या उमेदवाराचा काही खेळ जमेना... मला तर वाटतंय शेवटच्या दिवशी आपल्याला चान्स मिळेल, आशा ठेवू. दुसरं काय आपल्या हातात नाही राव.’’ दोघांनी मुकाट टपरीचा चहा घेतला अन् पक्ष कार्यालयाकडे पाहात उभे राहिले.

(nashik SAKAL Special chalta bolta Last day will get chance )