नाशिक : माजी खासदार समीर भुजबळ यांच्‍या वाढदिवसानिमित्त सोशल मीडियावर मंत्री छगन भुजबळ यांनी केलेल्‍या पोस्‍टमुळे महायुतीच्‍या पक्षांमध्ये सुंदोपसुंदी बघायला मिळाली. यासंदर्भात मंत्री भुजबळ यांना प्रश्‍न विचारला असता, ‘उमेदवारीचे संकेत वैगेरे काही दिलेले नाहीत. ते गडावर देवीदर्शनाला गेले असून, देवीमाताचा आशीर्वाद घेत आहेत. शुभेच्‍छांसाठी उभे राहातीलच ना... निवडणुकीसाठी नाही,’ अशी प्रतिक्रिया देताना वादाला पूर्णविराम दिला. (Chhagan Bhujbal clearified about bhuse)

महाराष्ट्र आरोग्‍य विज्ञान विद्यापीठात शासकीय वैद्यकीय महाविद्यालय उद्‌घाटन कार्यक्रमानिमित्त अन्न, नागरी पुरवठा व ग्राहक संरक्षणमंत्री छगन भुजबळ उपस्‍थित होते. कार्यक्रम संपल्‍यानंतर त्‍यांनी माध्यम प्रतिनिधींशी संवाद साधला. शुभेच्‍छांतून नांदगाव मतदारसंघातून उमेदवारीचे संकेत दिले असल्‍याच्‍या प्रश्‍नावर ते म्‍हणाले, संकेत वैगेरे काही नाही.

सर्व पक्ष मिळून महायुतीसाठी आम्‍ही सर्व काम करतो आहोत. यापुढेही सर्व मिळून काम करणार आहोत. उमेदवारीबाबत संकेत दिले, हा तर्क माध्यम प्रतिनिधींनी काढला असून, तसे काही नसल्‍याचे नमूद केले. नांदगावमध्ये मोठ्या प्रमाणावर कार्यक्रमांचे आयोजन केले जात असल्‍याच्‍या प्रश्‍नावर ते म्‍हणाले, की समीर भुजबळ गडावर दर्शनासाठी गेले आहेत. (latest marathi news)

यानिमित्त ते आशीर्वाद, शुभेच्‍छा स्‍वीकारत आहेत. आम्‍ही महायुतीचे सर्व गड राखताना सध्यापेक्षा अधिक आमदार आम्‍हाला जिल्ह्यातून निवडणून आणायचे आहेत. यादृष्टीने आम्‍ही प्रयत्‍न करत आहोत. नरहरी झिळवाळांबाबतच्‍या प्रश्‍नावर ते म्‍हणाले, की झिरवाळ यांनी यापूर्वी त्‍यांची भूमिका स्‍पष्ट केली असून, अफवांवर विश्‍वास ठेऊ नये.

हरियानातील भाजपच्‍या यशाबद्दल म्‍हणाले, की हरियाना एक्‍झिट पोलमध्ये वेगळेच चित्र दाखविले जात होते. मात्र शेतीबाबत अग्रेसर असलेल्‍या हरियानामध्ये भाजपने मिळविलेला विजय अतिशय मोठी गोष्ट आहे. या निकालातून देशाचा मूड लक्षात यायला सुरुवात झाली आहे, अशी प्रतिक्रिया मंत्री भुजबळ यांनी दिली.