Nashik News : सावित्रीबाई फुले पुणे विद्यापीठातर्फे दूरस्‍थ अध्ययन माध्यमातून शैक्षणिक सत्र ऑगस्‍ट २०२४ करिता प्रथम वर्षाच्‍या प्रवेशाचे वेळापत्रक जारी केले आहे. पुणे विद्यापीठाने जारी केलेल्‍या या वेळापत्रकानुसार इच्‍छुक व पात्रताधारक विद्यार्थ्यांना ३० जुलैपर्यंत ऑनलाइन प्रवेश अर्ज सादर करता येणार आहे. कला (बीए) आणि वाणिज्‍य (बी. कॉम) या अभ्यासक्रमांना प्रवेश दिले जाणार आहेत. (Savitribai Phule Pune University)

सावित्रीबाई फुले पुणे विद्यापीठातर्फे संलग्‍न महाविद्यालयामार्फत विविध विद्याशाखाअंतर्गत वेगवेगळे अभ्यासक्रम शिकविले जातात. हे अभ्यास पूर्णवेळ असल्‍याने विद्यार्थ्यांना हजेरीची अट सक्‍तीची असते. मात्र नोकरी, व्‍यवसाय किंवा अन्‍य विविध कारणांमुळे महाविद्यालयात उपस्‍थित राहाणे शक्‍य नाही.

परंतु शिक्षण पूर्ण करायची इच्‍छा असलेल्‍या व्‍यक्‍तींसाठी पुणे विद्यापीठातर्फे दूरस्‍थ अध्ययन माध्यमातून शिक्षणाची संधी उपलब्‍ध करून दिली जाते. याअंतर्गत शैक्षणिक सत्र ऑगस्‍ट २०२४ करिता प्रथम वर्षाची प्रक्रिया गुरुवार (ता.१६) पासून सुरू झाली आहे. (latest marathi news)

अर्ज प्रक्रिया व पुढील संभाव्‍य वेळापत्रक विद्यापीठाने जारी केले असून, विद्यार्थ्यांनी नोंद घेण्याचे आवाहन केले आहे. प्रवेश पात्रता, प्रवेश शुल्‍क, पाठ्यक्रम, परीक्षा पद्धती आणि प्रवेश प्रक्रिया आदींबाबतची माहिती संकेतस्‍थळावर माहितीपुस्‍तिकेच्‍या माध्यमातून उपलब्‍ध करून दिलेली असल्‍याचेही स्‍पष्ट केले आहे.

असे आहे वेळापत्रक

ऑनलाइन नावनोंदणीची मुदत :३० जुलैपर्यंत.

ऑनलाइन पद्धतीने अर्ज, शुल्‍क भरणे: ३१ जुलैपर्यंत

महाविद्यालयात प्रवेश अर्ज जमा करणे : १ ऑगस्‍ट.