मनमाड : येथील युनियन बँक शाखेतील घोटाळ्याचे प्रकरण ताजे असतानाच भारतीय स्टेट बँकेच्या शाखेतील कथित फसवणुकीने एका ग्राहकाची झोप उडवली आहे. पेन्शन योजनेत भरण्यासाठी दिलेले पैसे विमा प्रतिनिधीने भरलेच नसल्याचा प्रकार समोर आला आहे. त्यामुळे युनियन बँकेप्रमाणे स्टेट बँकेतही मोठा घोटाळा तर नाही ना, अशी चर्चा विमाधारकांमध्ये सुरू आहे. (Scam in State Bank Excitement among policyholders due to non payment)

दोन महिन्यांपूर्वी येथील युनियन बँकेत फसवणूक झाल्याचा विमा घोटाळा उघडकीस आला असताना आता येथील मध्यवर्ती ठिकाणी असलेल्या भारतीय स्टेट बँकेच्या शाखेत एका विमाधारक महिलेची फसवणूक झाल्याचा तक्रार अर्ज स्टेट बँकेच्या व्यवस्थापकांकडे आला आहे. या घटनेने शहरात पुन्हा एकदा खळबळ उडाली आहे.

संबंधित बँकेत एका विमा प्रतिनिधीने फसवणूक केली आहे. परंतु, अद्याप पोलिसांत फसवणुकीचा कुठलाही गुन्हा दाखल झालेला नाही. बँक व्यवस्थापकांना दिलेल्या तक्रार अर्जात म्हटले आहे, की ३ जानेवारी २०२२ ला विमा प्रतिनिधींकडून संबंधित बँकेत पेन्शन प्लॅन योजनेत पैसे गुंतवणूक केले होते. (latest marathi news)

त्यानुसार २०२२ ते २०२४ असे तीन वर्षांचे हप्ते भरले होते. पैसे भरण्यासाठी विमा प्रतिनिधीकडे दिले होते. पहिला हप्ता अकाउंटवरून कपात करण्यात आला. तर दुसरा हप्ता रोख दिला होता. तर तिसरा हप्ता फोन पेद्वारे भरला होता. एकूण सात लाख रुपयांची फसवणूक झाल्याचे महिलेचे म्हणणे आहे.

"स्टेट बँकेत विमा प्रतिनिधीने विमाधारकाचे पैसे बुडवल्याची घटना खरी असून, याबाबत विमाधारकांनी माझ्याकडे तक्रार अर्ज दिला आहे. याची चौकशी आणि कारवाईसंदर्भात वरिष्ठांकडे अर्ज पाठवला असून, तपास सुरू आहे." - विजयकुमार दीपक, शाखा प्रबंधक, स्टेट बँक