Nashik News : पावसाळ्याच्या आगमन होताच नांदूर-मानूर परिसरातील काही भागात बुधवारी (ता.१२) गाळमिश्रित पाण्याचा पुरवठा झाला. यामुळे महापालिकेने शुद्ध पाण्याचा पुरवठा करण्याची मागणी परिसरातील नागरिकांनी केली. बुधवारी नांदूर, मानूर परिसरात सकाळी नळांना पाणी येण्याच्या वेळेत पिण्यासाठी पाणी भरताना खूपच गढूळ पाणी येऊ लागल्याने अनेकांनी यासंबंधी आजूबाजूला चौकशी केली असता सर्व परिसरात गढूळ आणि गाळमिश्रित पाणी येत असल्याचे समजले.

यानंतर तत्काळ परिसरातील नागरिकांनी संबंधित विभागाला परिसरात पाणी गढूळ येत असल्याची तक्रार केली. मात्र तोपर्यंत नागरिकांनी गढूळ पाणी न भरणे पसंत केले. नांदूर मानुर या परिसरात सकाळी सातला आणि सायंकाळी सातला अशा दोन वेळेस पाणी पुरवठा होत असतो. पावसाळ्यातही या परिसरात यापूर्वी अशा गढूळ पाणी पुरवठा झालेले नाही.

हे गढूळ पाणी नेमके कशामुळे आले, हे समजू शकले नाही. बुधवारी नेहमीप्रमाणे या परिसरातील रहिवाशांनी पिण्याच्या पाण्याची वेळ होताच, नळ सुरू केले तेव्हा त्यातून अत्यंत गढूळ पाणी येत असल्याचे दिसून आले. (latest marathi news)

त्यामुळे हे पाणी पिण्यास योग्य नसल्याने ते भरण्याचे काम थांबविण्यात आले. तब्बल एक तासाने परिसरातील नळांना स्वच्छ पाण्याचा पुरवठा सुरु झाला. ऐन पावसाच्या सुरवातीलाच अशा प्रकारे गढूळ पाणी आल्याने अशा दूषित पाण्याच्या समस्येला तोंड देण्याची वेळ येते की काय असा प्रश्‍न परिसरातील रहिवाशांना पडू लागली आहे.

दूषित पाण्यामुळे अनेक आजारांना आमंत्रण मिळत असल्याने शुद्ध पाणी पुरवठा व्हावा अशी मागणी करण्यात येत आहे. बुधवारी नळांना गढूळ पाणी आल्याने ते भरण्याचे टाळण्यात आले.