Nashik Summer Heat : सूर्य पुन्‍हा आग ओकू लागला असून, रविवारी (ता.२८) नाशिकच्‍या कमाल व किमान तापमानाने नवा उच्चांक गाठला. कमाल तापमान ४१.२ अंश सेल्‍सीयस तर किमान तापमान २४.९ अंश सेल्‍सीयस नोंदविले आहे. पाऱ्यात वाढ झाल्‍याने उकाडादेखील वाढला आहे. गेल्‍या आठवड्यात सलग तीन-चार दिवस नाशिकचे कमाल तापमान चाळीस अंश सेल्‍सीयसपेक्षा अधिक नोंदविले गेले होते. (temperature touched 41 degrees Celsius )

नंतर अवकाळी पावसाने हजेरी लावल्‍यानंतर पारा काही प्रमाणात घटला होता. रविवारी दिवसा काही वेळ शहरात वातावरण ढगाळ राहिले. मात्र प्रखर सुर्यकिरणांचा सामना नाशिककरांना करावा लागला. पार वाढू लागला असताना यंदाच्‍या हंगामातील नवा उच्चांक गाठला गेला. रविवारी नाशिकचे कमाल तापमान ४१.२ अंश सेल्‍सीयस राहिले. (Latest Marathi News)

कमाल तापमानाप्रमाणे किमान तापमानातही वाढ झालेली आहे. यापूर्वी या हंगामातील किमान तापमान २४.५ अंश सेल्‍सीयसपर्यंत पोचले होते. मात्र हा स्‍तरही ओलांडताना २४.९ अंश सेल्‍सीयस तापमानाची नोंद झाली आहे.

दरम्‍यान उकाड्यात कमालीची वाढ झालेली असून, दिवसा घर, कार्यालयाला बाहेर पडताना आवश्‍यक खबरदारी घेतली जात आहे. तर रात्रीच्‍या वेळी उकाड्यापासून दिलासा मिळविण्यासाठी कुलर, एसीचा आधार घेतला जातो आहे. येत्‍या काही दिवसांमध्ये तापमानात आणखी वाढ होण्याचा अंदाज असल्‍याने नाशिककरांची लाही लाही होणार आहे.