नाशिक : शिक्षक मतदार संघाच्या मतमोजणीत तब्बल तीन मतपेटीत जादा मतपत्रिका आढळल्याने मतमोजणी प्रक्रियेला उशीर होत आहे. बहुचर्चित नाशिक विभाग शिक्षक मतदारसंघाच्या निवडणुकीच्या मतमोजणीसाठी नाशिकमध्ये आज सकाळी ८ वाजता सुरुवात झाली आहे. सर्वप्रथम ३० टेबलवर ५० मतपत्रिकांचे गठ्ठे बनविले जात आहेत. या दरम्यान ३० टेबलवर तीस मतपेट्या घेऊन गठ्ठे बनवत असताना सर्वात अगोदर चोपडा येथील मतपेटीत तीन पत्रिका ज्यादा आढळल्या होत्या. ( Teacher Constituency Vote Counting making process start slowly )

आता दुसऱ्या फेरीत निफाड व येवला येथील मतपेटीत एक-एक मत पत्रिका ज्यादा आढळली आहे. या टेबलवर किमान तीन ते चार वेळेस सर्व मतपत्रिका मोजल्या गेल्याने सुमारे अर्धा ते पाऊण तास वाया गेला असून यादरम्यान सर्व प्रक्रिया ठप्प होती.

तीन ते चार वेळेस मोजणी करूनही मते जुळत नसल्याने यावेळी सर्व उमेदवारांचा प्रतिनिधींना एकत्रित करत निवडणूक अधिकारी तथा विभागीय आयुक्त प्रवीण गेडाम यांनी या पत्रिका बाजूला ठेवून त्यावर शेवटी निर्णय घेण्यात येईल असे सांगितले.

या मतपेटीतील मतपत्रिका व निवडणूक विभागाकडे असलेले मतपत्रिकेचे क्रमांक जुळवून मग त्यावर निर्णय घेतला जाणार आहे. क्रमांक न जुळणाऱ्या मतपत्रिका बाद केल्या जातील असे सांगण्यात आले. दरम्यान,आता तिसऱ्या फेरीत ५० मतपत्रिकाचे गठ्ठे बनवण्याचे काम सुरू आहे.