Nashik News : भारतात दर ३३ सेकंदाला एक व्‍यक्‍तीचा हृदयविकाराच्‍या झटक्‍याने मृत्‍यू होतो आहे. बहुतांश रुग्‍णांची संख्या पन्नास वर्षांच्‍या आत असून, अनेकांना हृदयरोगाची लक्षणे देखील दिसून येत नाहीत. योग्‍य वेळी निदानातून वेळीच उपचार शक्‍य असून, त्‍यासाठी माधवबागतर्फे 'हार्टअटॅक के डर से आझादी' मोहीम हाती घेतली आहे. (Test developed to count 1 lakh heartbeats by madhavbaug)

याअंतर्गत हृदयाचे एक लाख ठोके मोजताना त्‍याचे रियल टाइम विश्‍लेषण केले जात असल्‍याची माहिती माधवबागचे व्यवस्थापकीय संचालक डॉ. रोहित साने यांनी पत्रकार परिषदेत दिली. डॉक्‍टरांच्‍या उपस्‍थितीत या मोहिमेचा प्रारंभ करण्यात आला. यानंतर झालेल्‍या पत्रकार परिषदेत योजनेची माहिती डॉ.साने यांनी दिली.

ते म्‍हणाले, की साधारणतः एका व्यक्तीस दर मिनिटाला ७२ ठोके म्हणजेच २४ तासात सुमारे एक लाख ठोके पडतात. सध्या प्रचलित चाचण्यांमध्ये या एक लाख ठोक्यांपैकी फक्त काहीच ठोक्यांचा अभ्यास होतो. त्यामुळे चाचणीत काही आढळले नाही तरी हृदयविकाराचा झटका येण्याचा धोका कायम असतो. (latest marathi news)

हृदयाचा एकही ठोका न चुकवता २४ तासातील एक लाख ठोक्यांचे अचूक निदान करण्यासाठी माधवबागतर्फे 'हार्ट अटैक के डर से आज़ादी' मोहिमेअंतर्गत वायरलेस उपकरण विकसित केले आहे. अगदी लहान आकाराचे उपकरण हृदयाच्या बाजूस चिटकवले जाते. यामुळे प्रत्येक ठोक्यांचा व्यवस्थित अभ्यास करुन हृदयविकाराची जोखीम तपासता येऊ शकते, असे सांगितले.

आधी हृदयविकाराचा त्रास झालेल्यांना, तसेच मधुमेह, उच्च रक्तदाब किंवा स्थूलतेमुळे धाप लागत आहे, पायावर सूज आहे, छातीत सतत दुखत राहते. अशा सर्वांना ही चाचणी उपयुक्‍त ठरु शकते. नाशिक येथील माधवबागच्‍या शाखांमध्ये कार्यरत डॉक्‍टर यावेळी उपस्‍थित होते.