Nashik News : येथील नाशिक जिल्‍हा मध्यवर्ती सहकारी बँकेचे प्रशासक प्रतापसिंह चव्‍हाण व मुख्य कार्यकारी अधिकारी संजय पाटील यांना ठार मारण्याची धमकी दिल्‍याचा प्रकार समोर आला आहे. बँकेत तात्‍पुरते कार्यरत कर्मचाऱ्यांच्‍या व्‍हॉट्‌सअप ग्रुपवरील चर्चेत ही धमकी दिल्‍याचे समोर आले आहे. यासंदर्भात बँकेमार्फत भद्रकाली पोलिस ठाण्यात तक्रार दाखल केली असून, अधिकाऱ्यांना धमकावणाऱ्यांवर कायदेशीर कारवाई करण्याची मागणी केली आहे. (Threat to kill District Bank administrator and CEO)

भद्रकाली पोलिस ठाण्याचे वरिष्ठ निरीक्षक यांच्‍या नावाने हे निवेदन दिले आहे. निवेदनात म्‍हटले आहे, की नाशिक जिल्‍हा मध्यवर्ती सहकारी बँकेचे प्रशासक प्रतापसिंह चव्‍हाण व मुख्य कार्यकारी अधिकारीपदी संजय पाटील कार्यरत आहेत. बँकेत तात्‍पुरते स्वरूपात काम करणाऱ्या चारशे कर्मचाऱ्यांना कायम करण्याची याचिका मे. औद्योगिक न्‍यायालयात रद्द ठरविण्यात आली.

यानंतर यासंदर्भात कर्मचाऱ्यांनी उच्च न्‍यायालयात जनहित याचिका दाखल केलेली आहे. अशा परिस्थितीत या कर्मचाऱ्यांना कायम केले जाऊ शकत नाही. व त्‍यांची पगारवाढ किंवा अन्‍य फायदेदेखील त्‍यांना देता येणार नाही. (latest marathi news)

परंतु या कर्मचाऱ्यांनी त्‍यांच्‍या एकत्रित चर्चा करून कारवाई करण्यासाठी व्‍हॉट्‌सअपवर ग्रुप तयार केलेला आहे. या ग्रुपवर कारवाईसंदर्भातील माहितीची देवाणघेवाण सुरू असते. या ग्रुपवरील चर्चेची संवादाची प्रत बँकेला मिळाली आहे. या संवादात नमुद केल्‍यानुसार ‘बँकेचे मुख्य कार्यकारी अधिकारी संजय पाटील यांचा खून करून टाका’, असा धमकीचा मेसेज प्रसारित करताना प्रसंगी तुरुंगात जाण्याची तयारी असल्‍याचे नमूद केले होते.

यासोबतच सीईओ प्रतापसिंह चव्‍हाण यांचा खून करण्याबाबतही मजकूर इंग्रजीत नमूद केला आहे. या संपूर्ण प्रकाराची गंभीर दखल घेत, संबधितांवर कायदेशीर कारवाई करावी असे नमूद केले आहे.