Nashik News : आठ ते दहा वर्षांपासून एकाच टेबलावर ठाण मांडून बसलेल्या कर्मचाऱ्यांच्या बदल्या केल्यानंतर प्रशासनाने दुसरा झटका देत पुन्हा नव्याने १३ कर्मचाऱ्यांची यादी जाहीर करत भाकरी फिरविली आहे. विभागप्रमुखांच्या कामकाजावर परिणाम होण्याची शक्यता लक्षात घेऊन काही कर्मचाऱ्यांची पुनर्स्थापनादेखील करण्यात आली. (Transfer continues in municipal headquarters)

महापालिका मुख्यालय सहा विभागांमध्ये गेल्या आठ ते दहा वर्षांपासून एकाच टेबलवर काम करणाऱ्या जवळपास सव्वाशे कर्मचाऱ्यांच्या बदल्या प्रशासनाने अचानक केल्याने महापालिका वर्तुळात खळबळ उडाली. रात्री उशिरा पुन्हा नव्याने १३ कर्मचाऱ्यांची यादी जाहीर करण्यात आली.

यातील काही कर्मचाऱ्यांचे कामकाज आक्षेपार्ह असल्याने त्यांना, आहे त्या जागेवरून उचलणे आवश्यक होते. त्याअनुषंगाने या बदल्या करण्यात आल्या आहेत, मात्र त्याचबरोबर काही विभागांकडून कामकाजावर परिणाम होण्याची शक्यता गृहीत धरून तातडीने बदली झालेल्या कर्मचाऱ्यांचे पुनर्स्थापना करण्याचीदेखील मागणी करण्यात आली. (latest marathi news)

त्यांना प्रशासनाने प्रतिसाद देताना जवळपास पाच ते सहा कर्मचाऱ्यांना पुन्हा आहे, त्याच जागेवर बसविण्याचा निर्णय घेतला आहे. येत्या काही दिवसात तांत्रिक संवर्गातील कर्मचाऱ्यांच्यादेखील बदल्या केल्या जाणार आहेत. त्याचबरोबर वरिष्ठ कर्मचाऱ्यांनादेखील बदलीला सामोरे जावे लागणार आहे.

दरम्यान बदल्यावरून ‘कही खुशी कही गम’ असे वातावरण महापालिका वर्तुळात आहे. ज्या कर्मचाऱ्यांनी अनेक वर्षांपासून बदलीसाठी अर्ज दाखल केले आहे, त्यांच्या बदल्या न झाल्याने नाराजी व्यक्त करण्यात आली. तर मलईदार पदावरून ज्यांच्या बदल्या झाल्या, त्यांच्याकडून तीव्र स्वरूपाची नाराजी व्यक्त केली गेली.