Nashik News : एकाच बाजूची छाटणी आणि धोकादायक वृक्षांच्या सर्वेक्षणचा अभाव यामुळे वृक्ष कोसळण्याच्या घटनांमध्ये वाढ झाली आहे. रिमझिम पाऊस असताना यंदा आत्तापर्यंत शंभरहून अधिक वृक्ष कोसळण्याच्या घटना शहरात घडल्या आहे. सुदैवाने जीवितहानी झाली नसली तरी आर्थिक नुकसान मोठे झाले आहे. पावसाळापूर्व कामानिमित्त पावसाळ्यात संभाव्य घटना लक्षात घेता वीज वितरण विभागाकडून उच्च दाबाच्या तारेवर लोंबकळणाऱ्या वृक्षांच्या फांद्या छाटणीचे कामे केले जातात. (Tree fall due to pruning on one side )

छाटणी करत असताना त्यांच्याकडून कुठल्याही प्रकारचे नियोजन केले जात नाही. केवळ तारांवर असलेल्या एकाच बाजूच्या फांद्यांची छाटणी मोठ्या प्रमाणावर केली जाते. त्यामुळे अन्य भागावर वृक्षांचा अधिक भार येत असतो. पावसाळ्यात मुळांचा भाग ओला झाल्याने भार आलेल्या भागाकडे वृक्ष झुकला जातो. दैनंदिन पाऊस पडल्याने त्याचे झुकण्याचे प्रमाण वाढत जाते. त्यानंतर अचानक संपूर्ण वृक्ष कोसळण्याची घटना घडत असते.

छाटणी करताना नियोजनपूर्वक छाटणी करून वृक्षाचा समतोल राखल्यास वृक्ष कोसळण्याचे प्रमाण घटण्यास मदत होईल. तसेच महापालिकेकडून गेल्या काही वर्षांपासून धोकादायक वृक्षांचे सर्वेक्षण करण्यात आलेले नाही. अनेक वृक्ष पोकळ झाले आहेत. त्यांचा कोसळण्याचा धोका वाढला आहे. तर काही पुरातन वृक्षांची छाटणी करणे आवश्यक आहे. अशा वृक्षांचा सर्वे करून धोकादायक वृक्ष काढण्यात आले तर वृक्ष कोसळण्याच्या घटना घडणार नाही. अशा प्रतिक्रिया नागरिकांकडून देण्यात आल्या. (latest marathi news)

अन्य कारणे

-रस्त्यांचे खोदकाम

-रस्ते जमिनीचे काँक्रिटीकरण

-वृक्षांच्या मुळांची वाढ खुंटणे

-मुळांना योग्य प्रमाणात क्षार, पाणी न मिळणे

-फांद्या छाटणीच्या नियोजनाचा अभाव

''वीज वितरण विभागाकडून फांद्या छाटणी करताना दक्षता घेतली जात नाही. एकाच बाजूच्या फांद्या छाटणी केल्या जातात. धोकादायक वृक्षांचे सर्वेक्षण होत नाही. यामुळे वृक्ष कोसळण्याच्या घटना घडत आहे.''- वसंत गिते, माजी आमदार