Nashik News : ड्रग्जमाफिया ललित पानपाटील याच्या शिंदेगावातील ड्रग्ज कारखाना आणि ललितच्या नाशिकमधून पलायनप्रकरणात शहर गुन्हेशाखेने वैभव लहामगे याची चौकशी केली होती. त्यामुळे त्याचा ड्रग्जशी संबंधावरून चौकशी होण्याची शक्यता आहे. गेल्या आठवड्यात मुंबई-आग्रा महामार्गावरील राजूर फाट्यावर कुस्तीपटू भूषण लहामगे यांच्या खूनप्रकरणी ग्रामीण पोलिसांनी ठाण्यातून मुख्य संशयित वैभव लहामगे यास अटक केली आहे. ( Vaibhav was also investigated in drug case )

तर, नुकत्याच आयसीआयसीआय बँकेच्या लॉकरमधील पाच कोटींच्या सोनेचोरीच्या गुन्ह्यातही वैभव संशयित आहे. गेल्या शुक्रवारी (ता.१०) भरदिवसा नाशिक-मुंबई महामार्गावरील राजूर फाटा येथे कुस्तीपटू भूषण लहामगे याची कोयत्याने वार करुन निर्घृण हत्त्या करण्यात आली होती. याप्रकरणी वाडिवर्र्हे पोलिसात खुनाचा गुन्हा दाखल असून, मयत भूषण हा मुख्य संशयित वैभवचा चुलत भाऊ होता.

वैभव याने जमिनीसह आर्थिक वादातून भूषण यांचा खून केल्याचे तपासातून समोर येते आहे. सराईत गुन्हेगार असलेल्या वैभव याच्या या खुनामध्ये त्याचे साथीदार सतिश चौधरी, रतन जाधव यांचाही समावेश असण्याची शक्यता असून, याच दोघांच्या मदतीने जुन्या गंगापूर नाक्यावरील आयसीआयसीआय बँकेच्या लॉकरमधील पाच कोटींचे सोन्याचे दागिने चोरीची गुन्हा केला आहे. त्यामुळे शहर पोलिसांसह ग्रामीण पोलीसही सतिश चौधरी, रतन जाधव यांच्या मागावर असून कसून शोध घेत आहेत.

दरम्यान, गेल्या वर्षी ऑक्टोबर २०२३ मध्ये ड्रग्ज माफिया ललित पानपाटील पुण्याच्या ससून रुग्णालयातून पळाला होता. त्यावेळी तो नाशिकमध्ये आला होता. त्यावेळी पोलिसांनी केलेल्या चौकशीत वैभव लहामगे याचीही पोलिसांनी चौकशी केली होती. परंतु त्याचा ललितच्या प्रकरणात थेट संबंध वा पुरावा पोलिसांची हाती लागला नव्हता. मात्र, त्याच्याकडून पोलिसांना ललितच्या कारनाम्याची माहिती मिळाली होती. सराईत गुन्हेगार असलेल्या वैभवच्या आणखी गुन्ह्यांमध्येही समावेश असण्याची शक्यता गृहित धरून पोलिस तपास करीत आहेत.