Nashik Water Shortage : पावसाळा सुरू होऊन दीड महिना झाला तरी जिल्ह्यात पुरेशा पावसाअभावी अनेक गावे व वस्त्यांची भिस्त आजही टॅंकरवरच आहे. टॅंकरद्वारे पाणीपुरवठा करण्याची शासनाने दिलेली ३० जूनची मुदत संपुष्टात आल्याने राज्य सरकारने टँकरद्वारे पाणीपुरवठ्याला एक महिन्याची मुदतवाढ देण्याचा निर्णय जाहीर केला आहे. त्यामुळे ही मुदत ३१ जुलैपर्यंत राहणार आहे. (765 villages on 199 tankers due to delay rain )

सद्यःस्थितीत जिल्ह्यात १९९ गावे व ५६६ वाड्यांना १९९ टॅंकरद्वारे पाणीपुरवठा सुरू आहे. गेल्या वर्षी सरासरीहून कमी पाऊस झाल्याने जिल्ह्याला दुष्काळाचा सामना करावा लागला. गेल्या वर्षी उन्हाळ्यात सुरू झालेले टँकर या उन्हाळ्यापर्यंत आणि आता पावसाळ्यातही सुरूच आहेत. यंदा दुष्काळाची तीव्रता मोठी असल्याने टॅंकरची संख्या ४०० वर पोचली होती. ७ जूनला जिल्ह्यात ३६२ गावे आणि ९४१ वाड्या अशा एक हजार ३०३ ठिकाणी ३९८ टँकरद्वारे पाणीपुरवठा सुरू होता.

जिल्ह्यातील सात लाख १६ हजार ५०१ नागरिक टँकरच्या पाण्यावर अवलंबून होते. साधारणः जूनमध्ये मॉन्सूनचे आगमन झाले, की जूनअखेर टँकर बंद होणे प्रशासनाला अपेक्षित होते. जिल्ह्यात पावसाचे दमदार आगमन झाले खरे. विशेष म्हणजे दुष्काळी भाग असलेल्या पूर्व भागात पावसाने दमदार हजेरीही लावली. या पावसामुळे टॅंकरची संख्या घटली आहे. मात्र, सर्वव्यापी पावसाने जिल्हाभरात हजेरी लावलेली नाही. (latest marathi news)

पश्चिम भागातील तालुक्यांना अद्यापही पावसाची प्रतीक्षा आहे. पुरेसा पाऊस नसल्याने जुलैच्या तिसऱ्या आठवड्यात १९९ टँकरद्वारे ७६५ ठिकाणी चार लाख नऊ हजार ९४९ व्यक्तींना पाणीपुरवठा करावा लागत आहे. जिल्हा प्रशासनाकडून ३० जूनपर्यंत टँकरद्वारे पाणीपुरवठ्याला परवानगी दिली होती. मात्र, ग्रामीण भागात अद्यापही पुरेसे पर्जन्यमान नसल्याने टँकरला मुदतवाढ देण्याचा निर्णय राज्य सरकारने घेतला होता.

त्यामुळे स्थानिक पातळीवर पाण्याची उपलब्धता होत नाही, तोपर्यंत टँकरद्वारे पाणीपुरवठा सुरूच ठेवण्यात येणार आहे. टॅंकरद्वारे पाणीपुरवठा करण्यासाठी जिल्ह्यात १४८ विहिरींचे अधिग्रहण करण्यात आले आहे. यात बागलाण (३१) व मालेगाव (४१) तालुक्यात सर्वाधिक विहिरी अधिग्रहित करण्यात आल्या आहेत.

तालुकानिहाय सुरू असलेले टॅंकर

नांदगाव (३६), येवला (३५), मालेगाव (३३), सिन्नर (२५), बागलाण (२९), देवळा (१७), चांदवड (२३), पेठ (१) दिंडोरी, कळवण, निफाड, नाशिक, त्र्यंबकेश्वर, इगतपुरी तालुक्यातील टॅंकर बंद झाले आहेत.