Nashik Silk Industry : दिंडोरी तालुक्यातील जेमतेम लोकसंख्या असलेले कोचरगाव. येथील हिरकणी बचत गटाच्या महिलांना घरातील पारंपरिक शेतीपेक्षा शाश्वत उत्पादन मिळेल, असा व्यवसाय करायचा होता. त्यासाठी त्यांनी रेशीम उद्योगाची निवड केली. जेमतेम शिक्षण असलेल्या महिलांना उद्योगाविषयी कोणतीही माहिती नव्हती.

त्यासाठी त्यांनी अभिव्यक्ती मीडिया फॉर डेव्हलपमेंट यांच्याकडे प्रशिक्षणाची मागणी केली. विशेष म्हणजे या रेशीम उद्योगात कोणत्याही पुरुषांचा हस्तक्षेप नसेल. सुरुवातीच्या लागवडीपासून विक्रीपर्यंतचे सर्व काम बचत गटाच्या महिलाच करणार आहेत. (Nashik Women silk industry for first time in district)

टीडीके कंपनी आणि अभिव्यक्ती मीडिया फॉर डेव्हलपमेंट यांच्या सहकार्याने बचत गटातील महिला रेशीम उद्योगाला सुरुवात करणार आहेत. प्रशिक्षणात महिलांनी आदिवासी भागात सुरू असलेले उद्योग समजून घेतले.

रेशीम उद्योग करताना कोणती काळजी घेतली पाहिजे, ज्ञान व कौशल्य आत्मसात केल्यास रेशीम शेती यशस्वी होऊ शकते, यासाठी ‘अभिव्यक्ती’चे भिला ठाकरे यांनी मार्गदर्शन केले. रेशीम शेती करणारे हरसूलचे शेतकरी अशोक भोये यांनी आपला अनुभव सांगत महिलांच्या शंकांचे निरसन केले. (latest marathi news)

"आर्थिक परिस्थिती सुधारण्यासाठी बचत गटातील महिलांना पारंपरिक शेतीपेक्षा चांगले उत्पन्न देणारा व्यवसाय असावा, असे वाटायचे. त्यासाठी आम्ही रेशीम उद्योगाचे प्रशिक्षण घ्यायचे ठरविले. आम्ही सर्व मिळून रेशीम उद्योग यशस्वी करून दाखवू."

- संगीता टोकारे, अध्यक्षा, हिरकणी महिला बचत गट

"हिरकणी महिला बचत गटाच्या रेशीम उद्योग करणाऱ्या पहिल्या महिला आहेत. महिलांनी स्वावलंबी व्हावे, त्यासाठी तुतीच्या रोपाची लागवड, उत्पादन, खरेदी-विक्री सर्व कामकाज केवळ त्या पाहतील, त्यात पुरुष कुणीही ढवळाढवळ करणार नाही."- भिला ठाकरे, ‘अभिव्यक्ती’