Nashik News : जिल्हा परिषद प्रशासनाला न कळविता परस्पर सुट्टी घेणे प्राथमिक शिक्षण विभागातील उपशिक्षणाधिकाऱ्यास भोवले आहे. मुख्यकार्यकारी अधिकारी यांना न कळवताच सुट्टीवर गेलेल्या या उपशिक्षणाधिकाऱ्यास प्रशासनाने नोटीस बजावत, खुलासा करण्याचे आदेश दिले आहेत. दरम्यान, यावरून प्रशासनाने शिक्षणाधिकारी यांनाही सुनावले असल्याचे बोलले जात आहे. (Mutual vacation takers Notice to Deputy Education Officer)

जिल्हा परिषदेच्या प्राथमिक शिक्षण विभागातील उपशिक्षणाधिकारी घरगुती लग्नानिमित्त रजेवर होते. ही रजा संपल्यानंतर ते हजर झाले अन दुसऱ्या लग्नासाठी पुन्हा रजेवर गेले. ही रजा घेताना त्यांनी मुख्यकार्यकारी अधिकारी यांची परवानगी घेणे आवश्यक होते. मात्र, त्यांनी शिक्षणाधिकारी यांची परवानगी घेतली त्यावेळी शिक्षणाधिकारी यांनी रजेचा अर्ज मुख्यकार्यकारी अधिकारी यांच्याकडे पाठवून मंजुरी घेऊ असे सांगितले.

त्यामुळे उपशिक्षणाधिकारी यांनी मुख्यकार्यकारी अधिकारी यांची परवानगी अथवा त्यांना कळविताच चार दिवस सुट्टीवर गेले. शिक्षण विभागातील बैठकी दरम्यान ही बाब मुख्यकार्यकारी अधिकारी यांच्या निर्दशनास आली असता त्यांना विचारणा केली. (latest marathi news)

त्यावर, उपशिक्षणाधिकारी यांनी शिक्षणाधिकारी यांना कळविल्याचे सांगण्याचा प्रयत्न केला. त्यावर संतप्त झालेल्या मुख्यकार्यकारी अधिकारी यांनी उपशिक्षणाधिकारी यांची चांगलीच खरडपट्टी काढली.

त्यानंतर, उपशिक्षणाधिकारी यांना प्रशासनाने नोटीस देखील बजावत, त्याबाबत खुलासा करण्याचे आदेश दिले आहे. दरम्यान, या रजेची परवानगी देण्यावरून शिक्षण विभागात वाद झाल्याची चर्चा विभागात रंगली होती.