Nashik ZP News : केंद्र शासनाने कामगार-कर्मचारी यांच्या धोरणाविरोधात अखिल भारतीय राज्य सरकारी कर्मचारी महासंघाने शुक्रवारी (ता. १६) एक दिवसाचा देशव्यापी संप घोषित केला. या देशव्यापी संपास समर्थन म्हणून महाराष्ट्र राज्य जिल्हा परिषद (ZP)कर्मचारी महासंघाच्या नेतृत्वात जिल्हा परिषद कर्मचाऱ्यांनी सर्व पंचायत समिती व क्षेत्रीय स्तरावरील कार्यालयासमोर सकाळी १० ते ११ या दरम्यान एक तास निदर्शने करून शासनाचे लक्ष वेधले. (Nashik ZP protests by Zilla Parishad employees)

त्यांनतर महासंघाचे वतीने प्रधानमंत्री व मुख्यमंत्री यांना जिल्हाधिकाऱ्यांमार्फत मागण्यांचे निवेदन दिले, अशी माहिती जिल्हा परिषद कर्मचारी महासंघाचे जिल्हाध्यक्ष अरुण आहेर, कार्याध्यक्ष भगवान पाटील, राज्य उपाध्यक्ष कैलास वाकचौरे, विभागीय महिला संघटक ज्योती केदारे यांनी दिली. जिल्ह्यातील सर्व राज्य सरकारी व जिल्हा परिषद कार्यालयासमोर सर्व संवर्ग जिल्हा परिषद कर्मचाऱ्यांनी एकत्र येऊन सकाळी दहाला मस्टरवर स्वाक्षरी करून सकाळी अकरापर्यंत एक तास कामबंद करून तीव्र निदर्शने केली.

या वेळी कार्यालयासमोर जुनी पेन्शन योजना लागू करा, कंत्राटी कर्मचाऱ्यांना कायम करा. रिक्त पदे तत्काळ भरा, राज्य शासनाकडे प्रलंबित असलेल्या सर्व संवर्गाचे प्रश्न तत्काळ मार्गी लावा व इतर मागण्यांबाबत जोरदार घोषणाबाजी करून आंदोलन करण्यात आले. या वेळी श्रीधर सानप, जगन्नाथ सोनवणे, सचिन पवार, विलास काळे, संगीता पांडव, अश्विनी थैल, रोहित मोरे, स्मिता बोडके, छाया सोनवणे, सोनवणे अप्पा, शारदा पिठे, राजेंद्र हरिश्चंद्र आदी सर्व संवर्ग कर्मचारी उपस्थित होते.