नाशिक : युवकांचे प्रेरणास्थान असलेले पंतप्रधान नरेंद्र मोदी यांच्या नेतृत्वात देश प्रगती करत आहे.

देशाच्या प्रगतीमध्ये युवकांचे स्थान अत्यंत महत्त्वाचे असून, त्यांच्यामुळेच युवकांचा देश म्हणून भारताची ओळख निर्माण झाल्याचे प्रतिपादन केंद्रीय क्रीडा राज्यमंत्री निसिथ प्रामाणिक यांनी केले. (nisith pramanik statement at National Youth Festival role of youth important in progress of country nashik)

२७ व्या राष्ट्रीय युवा महोत्सवात सोमवारी (ता.१५) देशातील पंधरा युवकांना राष्ट्रीय युवा पुरस्काराने सन्मानित करण्यात आले.

यावेळी युवा कार्य मंत्रालयाच्या संचालिका वनिता सूद, विभागीय आयुक्त राधाकृष्ण गमे, क्रीडा आयुक्त सुहास दिवसे उपस्थित होते. युवा महोत्सवानिमित्त निलगिरी बागेतील हनुमान नगरमध्ये उभारण्यात आलेल्या ‘महायुवा ग्राम’ मध्ये हा सोहळा पार पडला.

राष्ट्रीय युवा पुरस्कार १५ ते २९ वयोगटातील व्यक्तींना राष्ट्रीय किंवा समाजसेवेच्या क्षेत्रात उत्कृष्ट योगदानासाठी प्रदान केला जातो.

युवकांमध्ये जबाबदारीची भावना निर्माण करणे, वैयक्तिक वाढीस चालना देणे या कार्यासाठी हा पुरस्कार प्रदान केला जातो. स्वामी विवेकानंद यांच्या जयंतीनिमित्त दरवर्षी युवक महोत्सवात या पुरस्कारांचे वितरण होते.

महाराष्ट्रातील दोघांचा समावेश

राष्ट्रीय युवा पुरस्कार्थींमध्ये महाराष्ट्रातील दोन युवतींना सन्मानित करण्यात आले. अकोल्याची वैष्णवी गोतमारे हिने महिला सक्षमीकरण व रक्तदान या क्षेत्रात सामाजिक कार्य केले. यानिमित्त तिला २०२०-२१ या वर्षाचा पुरस्कार प्रदान करण्यात आला.

तर लातूर येथील विधी पलसापुरे हिने गरीब व वंचितांच्या शिक्षणासाठी विशेष प्रयत्न केले. त्याबद्दल केंद्र सरकारतर्फे तिला २०२०-२१ या वर्षांचा राष्ट्रीय युवा पुरस्कार प्रदान करण्यात आला.

राष्ट्रीय युवा पुरस्कार्थी

- अधी दैव (गुरुग्राम, हरियाना)

- अंकित सिंग (छतरपूर, मध्यप्रदेश)

- बिसाथी भारत (अनंतपुरम, आंध्रप्रदेश)

- केवल किशोरभाई पावरा (बोताड, गुजरात)

- पल्लवी ठाकूर (पठाणकोट, पंजाब)

- प्रभात फोगट ( झज्जर, हरियाना)

- राम बाबू शर्मा (जयपूर, राजस्थान)

- रोहित कुमार (चंडीगड)

- साक्षी आनंद (पाटणा, बिहार)

- सम्राट बसाक (धलाई, त्रिपुरा)

- सत्यदेव आर्य (बरेली, उत्तर प्रदेश)

- वैष्णवी श्याम गोतमारे (अकोला, महाराष्ट्र)

- विधी सुभाष पलसापुरे (लातूर, महाराष्ट्र)

- विनिशा उमाशंकर (तिरुवन्नमलाई, तमिळनाडू)

- विवेक परिहार (उधमपूर, जम्मू आणि काश्मीर)