मालेगाव : शहरातील अमली पदार्थांचा वाढता वापर शांतता, कायदा सुव्यवस्थेसाठी घातक ठरत आहे. शहराजवळील सोयगाव हे व्यसन, अमली पदार्थांपासून दूर होते.

सध्या गावात नशेखोर, मद्यपी, रोमिओंची वाढती संख्या नागरिकांसाठी डोकेदुखी ठरू लागली आहे. नागरिकांमधून याबाबत चिंता व्यक्त केली जात असून सोयगाव गावठाणमधील मुख्य जलकुंभ व जिल्हा परिषद शाळेमागील उद्यानातील शेड हे या मद्यपींची अड्डा बनला आहे.

याकडे महापालिका आणि पोलिसांचे दुर्लक्ष होत आहे. संबंधितांचा बंदोबस्त करावा अशी मागणी नागरिकांनी केली आहे. (Park Jalakumbh become place for alcoholics Citizens of Soygaon village increased headache due to neglect of municipality police Nashik)

येथील जलकुंभावर बसून गांजा ओढणाऱ्यांची संख्या वाढत आहे. दारूप्राशन करणारे नशेत असताना एखादी दुर्घटना अथवा मारामारीचे प्रसंग उद्भवू शकतो. प्रसंगी पाणी दूषित करू शकतात.

जलकुंभासह गावातील मराठी शाळेमागील उद्यानाच्या शेडमध्ये व परिसरात हे मद्यपींचा चोवीस तास वावर असतो. उद्यानात अनेकदा शेडमध्ये रिकामे सिरींज (इंजेक्शन) आढळून आले आहेत. शेडमध्ये जलकुंभ देखरेख करणाऱ्यांना शिवीगाळ करणारा मजकूर लिहिलेला आहे.

पोलिस प्रशासनाने ही बाब लक्षात घेऊन कारवाई करावी. उद्यान निर्मितीमागे परिसरातील नागरिकांच्या व्यायामासाठी, परिसरातील मुलांच्या खेळण्यासाठी उत्तम सोय व्हावी हा उद्देश होता. मात्र तो साफ अपयशी ठरत आहे.

किमान या दोन्ही ठिकाणी सीसीटीव्ही लावावेत. नशेखोरांमुळे सोयगावची होत असलेली वाताहत हा चिंतेचा विषय असून पोलिस प्रशासनाच्या दुर्लक्षामुळे सोयगावातील गुन्हेगारी व नशेखोरी वाढण्यास अप्रत्यक्षपणे मदतच मिळत आहे. शिवाय गावातील इतर मुले यामुळे व्यसनाधीन होण्याची शक्यता वाढली आहे.