सिडको (जि. नाशिक) : जागामालक विदेशात राहतात, याचा फायदा उचलून बनावट जागामालक उभा करून व बनावट कागदपत्र तयार करत जागा परस्पर नावावर केल्याप्रकरणी अंबड पोलिस ठाण्यात गुन्हा दाखल झाला असून, एका संशयितास अटक करण्यात आली आहे. (purchase of land by fraud owner Suspect arrested Nashik Latest Crime News)

फिर्यादी शरद कचेश्वर दवंगे (रा. म्हसरूळ, नाशिक) हे २१ ऑक्टोबरला दुपारी सिडकोतील सहदुय्यम निबंधक वर्ग- २ कार्यालयात त्यांच्या स्वतःच्या कामासाठी आलेले असताना गट नंबर ५३/१/१ एकूण क्षेत्र ००. ९७ आर. ही मिळकत खरेदी करण्यासाठी संशयित धीरज रमेश नन्नावरे दस्तनोंदणीचे काम करीत होते. या वेळी मूळ जागामालकाऐवजी नन्नावरे यांनी बनावट जागामालक म्हणून शीतलकुमार पाटील, तसेच गुप्ता यांना उभे करून स्वतःच्या नावाने १६ लाख ६० हजार रुपयांत खरेदी करून शासनाची फसवणूक केली. संशयित धीरज नन्नावरे, शीतलकुमार पाटील व गुप्ता यांच्याविरुद्ध फसवणुकीचा गुन्हा दाखल करण्यात आला असून, पुढील तपास पोलिस उपनिरीक्षक बिडकर करीत आहेत.