Nashik News: शहराच्या विकासासाठी नाशिक महापालिकेने सिंहस्थअंतर्गत विकास आराखडा तयार करण्याबरोबरच पर्यटन विभागाकडून ४० कोटी रुपयांचा निधी मागणी केली आहे. (Redevelopment of Municipal Ambitious Project through sponsors nashik News)

असे असले तरी त्या व्यतिरिक्त दादासाहेब फाळके स्मारक, स्वर्गीय यशवंतराव चव्हाण तारांगण, निमानी व नाशिक रोड बसस्थानक शाळांच्या इमारती, स्वर्गीय प्रमोद महाजन उद्यान हे महत्त्वाकांक्षी प्रकल्प प्रायोजकांच्या माध्यमातून पुनर्विकास करण्याचा निर्णय घेतला आहे. प्रायोजकांच्या माध्यमातून एकूण २३५ विकासकामे प्रस्तावित आहे, त्यातील १६७ कामे पूर्ण झाली आहेत.

महापालिकेला प्राप्त होणाऱ्या उत्पन्नापैकी बहुतांश उत्पन्न हे कर्मचाऱ्यांच्या वेतनावर खर्च होते. त्याचबरोबर एकूण उत्पन्नाच्या जवळपास ४३ टक्के हा बांधव स्वरूपाचा खर्च आहे. रस्ते आरोग्य शिक्षण पाणी या महत्त्वाच्या सुविधा नागरिकांना पुरवितानाच प्रकल्पांची उभारणी शहर सौंदर्यीकरण तसेच देखभाल- दुरुस्तीदेखील महापालिकेला करावी लागते. प्राप्त होणाऱ्या उत्पन्नाचा विचार करता सद्यःस्थितीत महापालिकेला प्रकल्पांचे पुनर्विकास परवडणारे नाही.

त्यामुळे प्रायोजकांच्या माध्यमातून पुनर्विकास करण्याचे नियोजन आहे. शासनाने यासंदर्भात नवीन धोरण आखले आहे. त्यात शहरातील व्यापारी, उद्योजक, बांधकाम व्यावसायिक तसेच संघटनांच्या माध्यमातून निधी उभारता येऊ शकतो. त्याच अनुषंगाने महापालिकेने निर्णय घेतला आहे, अशी माहिती शहर अभियंता शिवकुमार वंजारी यांनी दिली.

प्रायोजकांच्या माध्यमातून विकासकामांची सद्यःस्थिती

- एकूण मंजूर प्रस्ताव- २३५

- कामे पूर्ण झालेली ठिकाणे - १६७

- सुरू असलेली कामे- १९

- नवीन कार्यवाहीतील ठिकाणे - ४९

- नवीन प्रस्तावित महत्त्वपूर्ण कामे - ३१

पुनर्विकासाचे नवीन प्रस्ताव

- स्व. प्रमोद महाजन उद्यान.

- निमाणी व नाशिक रोड बसस्थानक नूतनीकरण

- शाळा, अंगणवाडी इमारतींचे सुशोभीकरण.

- चित्रपटमहर्षी दादासाहेब फाळके स्मारक.

- स्व. यशवंतराव चव्हाण तारांगण पुनर्विकास व संचलन.

- पूल, चौक, कारंजे, दुभाजक, फुटपाथ सुशोभीकरण.

- आरक्षित जागेवर क्रीडांगण, होळकर पुलावरील वॉल कर्टन दुरुस्ती.

- वाहतूक नियमनासाठी उपाययोजना.

- नाशिकरोडचा सावरकर उड्डाणपुलाचे सुशोभीकरण.

- सार्वजनिक स्वच्छतागृह उभारणी, सौर पॅनल बसविणे.

- गोदाघाट नूतनीकरण व सुशोभीकरण.