नाशिक : भद्रकाली प्रॅाडक्शनचे मराठी व्यावसायिक रंगभूमी (Marathi Commercial Theatre) गाजवणारे प्राजक्त देशमुख लिखित व दिग्दर्शित ‘संगीत देवबाभळी’ नाटकाचा मुंबई विद्यापीठाच्या (Mumbai University) अभ्यासक्रमात समावेश केला आहे. बी.ए. मराठीच्या अभ्यासक्रमात प्रथम वर्षासाठी हे पुस्तक २०२२ पासून अभ्यासक्रमाला असेल. (Sangeet Devbabhli in BA course of Mumbai University Nashik Latest Marathi News)

पॉप्युलर प्रकाशनने प्रकाशित केलेल्या प्राजक्त देशमुख यांच्या ‘संगीत देवबाभळी’ या नाटकाला अनेक महत्त्वाचे ४२ हून अधिक पुरस्कार प्राप्त झाले आहेत. नुकताच युवा साहित्य अकादमीच्या पुरस्कारानेही या संहितेचा सन्मान झाला आहे.

भंडाऱ्याच्या डोंगरावर संत तुकोबांना भाकरी द्यायला गेलेली नि काटा रुतून बेशुद्ध झालेली आवली आणि तिला लखूबाई बनून घरी घेऊन येणारी साक्षात रखूमाई यांच्यातील अनोख्या संवादातून लौकिक-अलौकिक नात्याची अद्भुत वीण प्राजक्त देशमुख यांनी नाटकातून गुंफली आहे.

देवत्व लाभलेल्या लखूबाईला आवलीच्या माध्यमातून आलेले लौकिक भान आणि संसारी आवलीच्या साध्या प्रश्नांनी गाठलेली अलौकिक पातळी हा नाटकाचा केंद्रबिंदू आहे. हे नाटक आता महाविद्यालयीन अभ्यासक्रमानिमित्त विद्यार्थ्यांना अभ्यासता येणार आहे.

देवरूख येथील शिक्षणप्रसारक मंडळाने यापूर्वीच ‘संगीत देवबाभळी’ नाटक अभ्यासक्रमात समाविष्ट केले आहे. विजया मेहता, (स्व.) जयंत पवार, डॉ. राजीव नाईक, सतीश आळेकर, नसिरुद्दीन शाह, परेश रावल, दिलीप प्रभावळकर आणि अशा रंगभूमीवरच्या दिग्‍गजांनी या नाटकाचे कौतुक केले आहे.

राज्य पुरस्कार ते साहित्य अकादमी या प्रवासानंतर महत्त्वाच्या विद्यापीठांच्या अभ्यासक्रमात संहिता आल्याने पुन्हा एकदा नाटकाचे साहित्यमूल्य अधोरेखित झाले आहे.