नाशिक : महापालिकेकडून गोवर रूबेला लसीकरण मोहिमेचा दुसरा टप्पा रविवार (ता. १५) पासून सुरू होत आहे. राज्य शासनाच्या आरोग्य विभागाकडून गोवर रूबेला लसीकरण करण्याच्या सूचना देण्यात आल्या आहे.

महापालिकेकडून पहिला टप्पा राबविण्यात आला. त्यात २,३३८ बालकांना गोवर रूबेला लस टोचण्यात आली. यात एमआर १ चे १, १३५, तर एमआर २,०१३ बालकांना डोस देण्यात आले. आता पंधरा ते पंचवीस जानेवारी या कालावधीसाठी मोहिमेचा दुसरा टप्पा सुरू होईल. शहरात वंचित लाभार्थ्यांचे लसीकरण या कालावधीत केले जाणार आहे.

महापालिकेचे वैद्यकीय अधिक्षक डॉ. बापूसाहेब नागरगोजे, सहाय्यक वैद्यकीय अधिकारी व माता बालसंगोपन अधिकारी अजिता साळुंखे यांच्या मार्गदर्शनाखाली ही मोहीम पार पडत आहे. एकाही बालक लसीपासून वंचित राहणार नाही, याची काळजी घेण्याचे आवाहन करण्यात आले आहे.