चांदवड (जि. नाशिक) : चांदवडला अवैध बायो-डिझेलचा मोठा साठा आढळल्याने खळबळ उडाली आहे. पेट्रोल- डिझेलच्या किमती गगनाला भिडल्या असताना हा साठा आढळल्याने हे मोठे रॅकेट असण्याची शक्यता नाकारता येत नाही.

चांदवड येथील मुंबई- आग्रा महामार्गालगत हॉटेल राजमुद्रा जवळील मोकळ्या जागेत उभ्या असलेल्या ट्रक क्रमांक (MH-04-VA-8537) मध्ये ठेवलेल्या एका लोखंडी टाकीत 1 लाख 92 हजार रुपये किमतीचे दोन हजार पाचशे लिटर बायो डिझेलचा बेकायदेशीर साठा आढळून आला. तर याठिकाणी (MH-43-H-0757) क्रमांकाचा अजून एक ट्रक सापडला. या ट्रकच्या डिझेलच्या टाकीत दिडशे लिटर बायो डिझेल आढळले, शिवाय या ठिकाणी मोठ्या टाकीतून दुसऱ्या वाहनात बायो डिझेल भरण्यासाठीचे मशीन, पाइप व इतर साहित्य सापडल्याने अजूनच संशय बळावला आहे.

या प्रकाराची तक्रार चांदवड तहसील कार्यालयातील प्रभारी पुरवठा निरीक्षक दिलीप मोरे यांनी चांदवड पोलिस ठाण्यात दिली आहे. याप्रकरणी जीवनावश्यक वस्तू अधिनियम व स्फोटक पदार्थ कायद्याअंतर्गत गुन्हा दाखल करण्यात आला आहे. याठिकाणी चांदवड पोलिसांनी टाकलेल्या धाडीत दोन ट्रक व बायो- डिझेलसह जवळपास 16 लाख रुपये किमतीचा मुद्देमाल जप्त केला आहे. याप्रकरणी मोबीन अकील शेख (वय 37 रा. श्रीराम मंदीराजवळ चांदवड), फरहान अली मोहम्मद अरशद (वय 29 रा. मध्यप्रदेश) हा दुसऱ्या ट्रकवरील चालक यांना अटक केली असून त्यांना न्यायालयाने तीन दिवसांची पोलिस कोठडी दिली आहे. याप्रकरणी पोलिस निरीक्षक समीर बारावकर यांच्या मार्गदर्शनाखाली सहायक पोलिस निरीक्षक रवींद्र जाधव तपास करीत आहेत.