नाशिक : गणेश उत्सवाच्या काळात नागरिकांना त्रास होऊ नये यासाठी स्मार्टसिटी कंपनीकडून काही कामांना ब्रेक देण्याचा निर्णय घेण्यात आला आहे. त्यातीलच एक महत्त्वाचा निर्णय म्हणजे मानवी चौक ते काट्या मारुती चौकापर्यंत स्मार्टसिटी अंतर्गत सुरू असलेले काम गणेशोत्सव पूर्ण होईपर्यंत बंद ठेवण्याच्या सूचना स्मार्टसिटी कंपनीचे मुख्य कार्यकारी अधिकारी सुमंत मोरे यांनी दिल्या. (Smart City work break during Ganeshotsav 2022 Nashik latest marathi news)

स्मार्टसिटी कंपनीअंतर्गत गावठाण भागात पायाभूत सुविधांची कामे हाती घेण्यात आली आहे. पावसामुळे कामे संथगतीने सुरू आहे. अनेक ठिकाणी रस्ते खोदून ठेवल्याने वाहतुकीला अडथळा निर्माण होत आहे. कामांमुळे अनेक ठिकाणी पाण्याची पाइपलाइन फुटणे यासारख्या तक्रारी वाढत आहेत.

यातून मार्ग काढत असताना आता गणेशोत्सव जवळ आल्याने नागरिकांना त्रास होऊ नये म्हणून मुख्य कार्यकारी अधिकारी मोरे यांनी गावठाण भागाचा दौरा करून काही कामे स्थगित करण्याचा निर्णय घेतला आहे. त्या अनुषंगाने स्मार्टसिटी कंपनीकडून ठेकेदारांना सूचना देण्यात आल्या आहेत. यात मानवी चौक ते काट्या मारुती चौक या दरम्यानचे काम गणेशोत्सव होईपर्यंत बंद ठेवण्याचे आदेश देण्यात आले.

भालेकर मैदानावर सुरक्षारक्षक

सुंदर नारायण मंदिर ते पंचवटी कारंजा या दोन ठिकाणी असलेल्या अडचणी सोडून गणेश मंडळांना कुठलीही अडचण येऊ नये यासंदर्भात दक्षता घेण्याच्या सूचना देण्यात आल्या. मखमलाबाद स्टॅन्ड ते मालेगाव स्टॅन्ड या दरम्यानची कामे २९ ऑगस्टपर्यंत पूर्ण करण्यात यावी. तसेच, रामवाडी मुख्य चौफुली येथे काम पूर्ण करून गणेशोत्सव काळात अडचण येऊ नये या संदर्भात कार्यवाही करावी.

लक्ष्मीनारायण मंदिर ते सरदार चौक या दरम्यान मंडळांना मंडप टाकण्यात अडचण येणार नाही, याची दक्षता घ्यावी. गोरेराम लेन येथील रस्ता तात्पुरता रहदारीसाठी खुला करण्याच्या सूचना देण्यात आल्या. भालेकर मैदानावर सुरक्षारक्षक नियुक्त करण्याच्या सूचना श्री. मोरे यांनी दिल्या.