पिंपळगाव बसवंत : द्राक्ष हंगामाचे वेध लागलेले असताना, उपउत्पादन असलेल्या सल्फरच्या बेदाण्याला १५० रुपये प्रतिकिलो दर मिळत आहे. जुन्या बेदाण्याचा साठा अंतिम टप्प्यात आला आहे. दर्जा सर्वात्तम असलेल्या बेदाणा भाव खात आहे. परदेशात अद्याप मागणी टिकून आहे. (Sulfur raisin price Rs 150 per kg at pimplegaon nashik)

पिंपळगाव बाजार समितीत लिलावासाठी सोमवारी (ता. ५) तीनशे टन बेदाण्याची आवक झाली. मागील हंगामात नाशिक जिल्ह्यात बेदाण्याची १८ हजार टन उत्पादन झाले होते. अजून दीड हजार टन बेदाणा उत्पादकांकडे आहे.

मागील हंगामात उत्पादित झालेल्या बेदाण्याला सध्या रशिया, युरोप, सौदी अरेबिया येथून मागणी आहे. मागणी पुरविण्यासाठी व्यापाऱ्यांची सोमवारी बेदाणा खरेदीसाठी चढाओढ लागलेली दिसली. किमान १००, कमाल १५५ तर सरासरी १३० रुपये प्रतिकिलो दर बेदाण्याला मिळाला.

पिंपळगाव बाजार समितीचे सभापती तथा आमदार दिलीप बनकर यांनी बेदाणा लिलावाला सोमवारी भेट दिली.

बेदाणा व्यापारी शितलकुमार भंडारी, स्नेहल शाह, शांतिलाल चोरडीया, मोतीलाल चोरडीया, रघुनाथ शिनकर, राजेंद्र कुंभार, प्रवीण कुलथे, महेंद्र ओसवाल, योगेश ठक्कर, प्रमोद राठी, करसदास ठक्कर, रवींद्र घुमरे, इक्बाल कुरेशी, सुनील दीक्षित, आतीश कोचर, आकाश कोचर यांनी लिलावात भाग घेतला.

"मागील हंगामातील बेदाणा अंतिम टप्प्यात आहे. नव्या बेदाण्याचे आगमन जानेवारीत होईल. परदेशात मागणी टिकून असल्याने भाव स्थिर आहे."-शितलकुमार भंडारी, बेदाणा व्यापारी