IT Sector Career : आताची तरुण पिढी आयटी क्षेत्रात प्रोगामिंग क्षेत्रात उत्तम कामगिरी करीत आहे. मात्र, हेच काम करीत असताना त्यांना ओळख मिळत नाही, हे दुर्दैव आहे. तसेच, विद्यार्थ्यांना सायबर सुरक्षितता, एआयमध्ये करिअरच्या भरपूर संधी उपलब्ध आहेत.

विद्यार्थी फ्रीलान्स कामही करू शकतात, विद्यार्थ्यांचे कौशल्यच महत्त्वाचे असल्याचे मत राष्ट्रपती पुरस्कार विजेते तथा सायबर तज्ज्ञ तन्मय दीक्षित यांनी व्यक्त केले. (Tanmay Dixit statement Cyber ​​Security for Students Career Opportunities in AI nashik)

सपकाळ नॉलेज हब येथे झालेल्या ‘सकाळ’- यिन केंद्रीय कॅबिनेट दोनदिवसीय पावसाळी अधिवेशनातील पहिल्या दिवसातील शेवटच्या सत्रात ‘सायबर फ्रॉड व करिअर करण्याची संधी’ या विषयावर त्यांनी मार्गदर्शन केले.

तन्मय दीक्षित म्हणाले, की एआय आणि मशिन लर्निंगच्या माध्यमातून सर्व्हिसेसचा वापर वाढला आहे. फोटो, ऑडिओच्या माध्यमातूनही फसविले जाऊ शकते, त्यामुळे सतर्क राहण्याची आवश्यकता आहे. ज्येष्ठांवरील सायबर हल्ले वाढले आहेत.

त्यांच्यात टेक्निकल साक्षरता कमी आहे. सायबर क्राईमच्या जाळ्यात किंवा ब्लॅकमेलिंगमध्ये अडकल्यास त्यांना टेक्नॉलॉजी वापरता येत नसल्याने जाळ्यात पटकन अडकतात. त्यांना बाहेर येण्याचा मार्ग सापडत नाही. ज्येष्ठांनी सायबर साक्षर होऊन सुरक्षित राहणे महत्त्वाचे आहे.

हेही वाचा : Credit Card फसवणूक....काय घ्याल काळजी?

नॅशनल पोर्टलवर तक्रार नोंदवावी

आर्थिक फ्रॉडपासून बचाव ही काळाची गरज आहे. क्रेडिट, डेबिट कार्डची माहिती बनावट संकेतस्थळावर अपलोड करू नका. संकेतस्थळे बनावट वाटत नसले, तरीही त्या सेफच आहेत, असे नाही. तुमचा वेब कॅमेरा सुरक्षित ठेवणे आवश्यक आहे.

सायबर क्राईम झाल्यास सर्वप्रथम तक्रार केंद्रीय गृह मंत्रालयाच्या संकेतस्थळावरच द्यावी. तक्रार नॅशनल पोर्टलवर गेल्यास तेव्हा त्याचा तपास जलदगतीने होण्यास मदत होते.