नाशिक : सलग पाचव्या दिवशी चाळीस ते बेचाळीस अंश सेल्सिअस दरम्यान तापमान स्थिर राहिल्याने नाशिककरांना खानदेश, विदर्भाचा फिल येत आहे. उन्हाच्या तडाख्याने दुपारनंतर बहुतांश दुकानांचे शटर डाऊन होत असल्याचे दिसत आहे. संध्याकाळी पाचनंतर बाजारपेठेतील वातावरण पुर्ववत होताना दिसते. नागरिकदेखील टोपी, छत्री घेऊनच बाहेर पडतं आहे. (Nashik Summer Update)

गुरुवारी शहरात तिघांचा उष्माघाताने मृत्यू झाल्याचे वृत्त प्रसिद्ध झाल्यानंतर डोक्यावर सावली घेऊनच शहरात नागरिक वावरताना दिसतात. हेल्मेटची सक्ती असली तरी अनेक जण हेल्मेट परिधान करतं नाही, परंतु उन्हामुळे का होईना नियमाची अंमलबजावणी होताना दिसतं आहे. थंडपेयांमध्ये पारंपरिक ताकाला मागणी वाढली असून शहरात ठिकठिकाणी ताक, मठ्ठा, लस्सी, लिंबू-सरबत, उसाचा रस विक्रीचे दुकाने थाटले आहेत. शुक्रवारी (ता. २९) सायंकाळनंतर गार हवा सुटल्याने काहीसा दिलासा मिळाला. दरम्यान, हवामान विभागाने अजून तीन दिवस उष्णतेची लाट राहण्याची शक्यता वर्तविल्याने नाशिकसाठी ‘हॉटेस्ट डे’ चे वातावरण कायम राहणार आहे.