नामपूर (जि. नाशिक) : शहर व परिसरातील गावांमध्ये सोमवारी (ता. २७) दुपारी दोन ते तीनच्या सुमारास मुसळधार पावसामुळे (Heavy Rain) शेतकरी सुखावला आहे. मोसम खोऱ्यात सातत्याने होणाऱ्या पावसामुळे पेरणी झालेल्या पिकांना दिलासा मिळाला आहे. पावसामुळे ताहाराबाद रस्त्यालगत ब्राह्मणपाडे ते आसखेडा दरम्यान बाभळीचे मोठे झाड रस्त्यावर उन्मळून पडल्याने वाहतूक पूर्णतः ठप्प (Traffic Jam) झाली आहे. (Traffic jam on Taharabad road driver due to tree fallen Nashik News)

मोसम खोऱ्यातील नामपूर, द्याने, आसखेडा, ब्राह्मणपाडे, उत्राणे, मोराणे, खिरमाणी, काकडगाव, खडकीपाडा, एकलहरे, वाघळे, वाडीपिसोळ, पिंपळकोठे, नांदीन परिसरात पावसाने चांगली हजेरी लावली. नामपूरला सोमवार आठवडे बाजाराचा दिवस असल्याने ऐनवेळी आलेल्या पावसामुळे नागरिकांची तारांबळ उडाली. बाजारानिमित्त परिसरातील नागरिक मोठ्या संख्येने नामपूरला येतात. पावसामुळे नागरिकांचे मोठ्या प्रमाणात हाल झाले. शेतांमध्ये मोठ्या प्रमाणात पाणी साचल्याने तलावाचे स्वरूप प्राप्त झाले आहे. शेतांमधील माती रस्त्यावर वाहून आल्याने ब्राह्मणपाडे गावाजवळील धोकादायक वळणावर रस्ता खराब झाला आहे. परिसरातील अनेक गावांमधील वीज पुरवठा खंडित करण्यात आला होता. पावसामुळे वातावरणात गारवा निर्माण झाल्याने चार दिवसांपासून उकाड्यामुळे हैराण झालेल्या नागरिकांना काहीसा दिलासा मिळाला. पेरणीयोग्य पावसामुळे बळीराजा सुखावला आहे.