Nashik Anant Chaturdashi : सार्वजनिक श्रीगणेश विसर्जन मिरवणूक मार्गावर वाहतुकीची कोंडी होऊ नये, यासाठी पोलिस आयुक्तालयातर्फे नाशिक शहर, नाशिकरोड, गंगापूर या ठिकाणी मिरवणुकीच्या दिवशी वाहतूक मार्गात बदल केले आहेत.

येत्या गुरुवारी (ता.२८) सकाळी १० ते मिरवणूक संपेपर्यंत या बदललेल्या मार्गावरूनच वाहतुकीचे आदेश शहर वाहतूक शाखेचे पोलिस उपायुक्त चंद्रकांत खांडवी यांनी दिले आहेत.

तसेच, शुक्रवारी (ता. २९) मुस्लिम बांधवांकडून काढण्यात येणाऱ्या ईद ए मिलाद जुलूस मिरवणुकीच्या पार्श्वभूमीवरही वाहतूक मार्गात बदल केले आहेत. (Traffic route changes due to Ganesh Visarjan procession anant chaturdashi nashik news)

शहर गणेश विसर्जन मिरवणूक मार्ग

नाशिक शहरातील मुख्य मिरवणुकीला गुरुवारी (ता.२८) दुपारी १० वाजेपासून वाकडी बारव (चौक मंडई) येथून प्रारंभ होईल. मिरवणूक जहागीर मशीद - दादासाहेब फाळके रोड - महात्मा फुले मार्केट - बादशाही लॉज कॉर्नर - विजयानंद थिएटर - गाडगेमहाराज पुतळा - गो. ह. देशपांडे पथ - धुमाळ पॉइंट - सांगली बॅंक सिग्नल - महात्मा गांधी रोड - मेहेर सिग्नल - स्वामी विवेकानंद रोड - अशोकस्तंभ - नवीन तांबट आळी - रविवार कारंजा - होळकर पूल - मालेगाव स्टॅन्ड - पंचवटी कारंजा - मालवीय चौक - परशुराम पुरिया रोड - कपालेश्वर मंदिर - भाजीबाजार - म्हसोबा पटांगणावरून विसर्जन ठिकाणी जाणार आहे.

वाहतूक मार्गातील बदल

विसर्जन मिरवणुकीदरम्यान, निमाणी बसस्थानक, पंचवटी कारंजा येथून सुटणाऱ्या शहर बसेस या पंचवटी डेपोतून सुटतील. तसेच ओझर, दिंडोरी, पेठ येथून शहरात येणाऱ्या सर्व बसेस व अन्य वाहने आडगाव नाका, कन्नमवार पूल व पुढे द्वारका सर्कलकडून नाशिकरोड, नाशिक शहर व शहरातील अन्य ठिकाणी जातील.

तर पंचवटीकडे जाणारी सर्व वाहने द्वारका सर्कल, कन्नमवार पुलावरून जातील. रविवार कारंजा व अशोकस्तंभ येथून सुटणाऱ्या शहर वाहतुकीच्या सर्व बसेस शालिमार येथून सुटतील व त्याच मार्गाने ये-जा करतील.

नाशिकरोड गणेश विसर्जन मिरवणूक मार्ग

नाशिकरोडला बिटको चौकातून मिरवणूक निघेल. दुपारपासून ते मिरवणूक संपेपर्यंत वाहतूक मार्गावरील बदलाची अंमलबजावणी केली जाईल. बिटको चौकातून सुरू झालेली मिरवणूक शिवाजी महाराज पुतळा - देवी चौक - रेल्वेस्टेशन पोलिस चौकी - सुभाषरोड - सत्कार पॉइंट - देवळालीगाव गांधी पुतळा - खोडदे किराणा दुकान ते वालदेवी नदी देवळालीगावपर्यंत जाणार आहे.

नाशिकरोड विसर्जन कालावधीतील बदल

पंचवटी डेपो, निमाणी बस स्टॅन्ड, महामार्ग, सिडको येथून नाशिकरोड रेल्वे स्टेशनकडे येणाऱ्या राज्य परिवहन विभागाच्या बसेस दत्त मंदिर सिग्नलपर्यंत जातील व तेथूनच माघारी फिरतील. सिन्नरकडे जाणाऱ्या राज्य परिवहन मंडळाच्या बसेस व अन्य वाहने उड्डाणपुलावरून जा-ये करतील.

देवळाली गणेश विसर्जन मिरवणूक मार्ग

नाशिकरोड-देवळाली कॅम्प या मार्गावरील सिलेक्‍शन कॉर्नरपासून मिरवणूकीला प्रारंभ होईल. झेंडा चौक - शारदा चौक - जामा मशिद रोड - जुने बसस्टॅण्ड - सिलेक्‍शन कॉर्नर - संसारी नाका - संसारी गाव - दारणानदी. यामार्गावरील मिरवणुकीतील वाहने वगळता अन्य वाहनांना सदरचा मार्ग वाहतुकीसाठी बंद असेल.

गंगापूर पोलिस ठाणे (आनंदवली नदीपात्र)

आनंदवली नदीपात्रात आसपासची नागरी वस्ती, गणेश मंडळे गणेश विसर्जनसाठी येत असल्याने मोठ्या प्रमाणावर गर्दी होत असते. अशावेळी चांदशी गावाकडून आनंदवली नदीपात्र ओलांडून आनंदवलीगाव मार्गे गंगापूरला जोडणाऱ्या रस्त्यास येणाऱ्या वाहनांमुळे वाहतूक कोंडी होऊ नये, यासाठी चांदशीगाव ते आनंदवली नदीपात्र आणि आनंदवली नदीपात्र ते चांदशी गावापर्यंतचा मार्ग दोन्ही बाजूने (मिरवणुकीतील वाहने वगळून) दुपारी चार वाजेपासून मिरवणूक संपेपर्यंत बंद राहील. नाशिककडे येणारी व नाशिकहून चांदशीकडे जाणाऱ्या वाहनधारकांनी आनंदवली पुलाकडे न जाता चांदशीगाव रोडने नाशिक तट कालवा येथून उजव्या बाजूने वळून कालव्यामार्गे मखमलाबाद रोडने लागून रामवाडीमार्गे अशोकस्तंभ ते गंगापूररोड या मार्गाने प्रवास करावा.

जेलरोडच्या वाहतूक मार्गाचे बदल

नांदूर नाका ते सैलानीबाबा चौक व सैलानीबाबा चौक ते नांदूर नाका हा मार्ग दोन्ही बाजूने सर्व प्रकारच्या वाहतुकीसाठी (मिरवणुकीतील वाहने वगळून) दुपारी चार वाजेपासून ते मिरवणूक संपेपर्यंत बंद असेल.

याकाळात नाशिकरोड विभागातील नांदूर नाका ते सैलानीबाबा चौक या मार्गाने जाणारी वाहने ही नांदूर नाका, औरंगाबाद रोडने तपोवनातील स्वामी जनार्दन पुलमार्गे जातील. त्याच मार्गाने येतील. वाहतूक मार्गातील बदल पोलिस सेवेतील वाहने, रुग्णवाहिका तसेच अग्निशमन दलातील वाहने व या परिसरात राहणाऱ्या नागरिकांच्या वाहनांसाठी लागू राहणार नाही.