Nashik News : ‘वन नेशन-वन चलान’ हा नॅशनल इन्फॉर्मेशन सेंटरअंतर्गत (एनआयसी) पायलट प्रोजेक्ट नाशिक शहर पोलिस आयुक्तालय हद्दीमध्ये सुरू आहे. यासाठी इ-चलन मशिन शहर वाहतूक पोलिसांच्या हाती पोचले आहेत.

परंतु त्यातील काही तांत्रिक अडचणींमुळे अंमलदारांसाठी विशेष प्रात्यक्षिक कार्यशाळेचे आयोजन करण्यात येऊन त्यांना प्रशिक्षण देण्यात आले आहे. ()

इ-चलनमुळे देशभरातील कुठल्यावर बेशिस्त वाहनांवर एका क्लिकवरून दंडात्मक कारवाई करणे सोपे झालेले आहे. गृह विभागाने राज्यभरातील अपघातांना आळा घालण्यासाठी आणि बेशिस्तांवर धडक कारवाई करण्यासाठी ‘वन नेशन-वन चलान’च्या पायलट प्रोजेक्ससाठी नाशिक शहर पोलिस आयुक्तालयाची निवड केली होती. त्यासाठी गृहविभागाने ५७ लाखांच्या निधीही मंजूर केला होता.

त्याअंतर्गत यंत्रसामुग्रीसह इ-चलन मशिन खरेदी केले. इ-चलनाच्या माध्यमातून गेल्या वर्षीच्या नोव्हेंबरपासून शहर आयुक्तालय हद्दीमध्ये कारवाई सुरू केलेली आहे. तसेच, वाहतूक शाखेतील अधिकारी व अंमलदारांना प्रशिक्षणही देण्यात येत आहे. मंगळवारी (ता. १३) वाहतूक शाखेतील अंमलदारांसाठी दोन सत्रांमध्ये विशेष प्रशिक्षण कार्यशाळा घेण्यात आली.

कार्यशाळेतून अंमलदाराच्या शंकांचे निरसन करण्यात आले असून, मशिनच्या हाताळणीचेही प्रशिक्षण अंमलदारांना देण्यात आले. यामुळे बेशिस्तावर जागेवर दंडात्मक कारवाई करणे सोपे तर झाले आहेच, शिवाय, राज्याबाहेरील कोणत्याही बेशिस्त वाहनावरही कारवाई करणे सोपे झाले आहे.

''नाशिकमध्येच पायलट प्रोजेक्ट असल्याने इ-चलन मशिन हाताळताना अंमलदारांना काही अडचणींना सामोरे जावे लागत होते. त्यामुळे वाहतूक शाखेतील अंमलदारांसाठी या विशेष कार्यशाळेचे आयोजन करून प्रशिक्षण देण्यात आले आहे.''- आनंदा वाघ, सहायक पोलिस आयुक्त, शहर वाहतूक शाखा.