Nashik News: उत्कृष्ट काम करणारे सरपंच, ग्रामसेवक, अधिकारी व लोकप्रतिनिधींना पुरस्काराने सन्मानित करून प्रोत्साहन देण्याचे काम करणाऱ्या सरपंच परिषदेने उपसरपंचांची ‘आदर्श सरपंच’ पुरस्कारासाठी निवड करून सर्वांना आश्‍चर्याचा धक्का दिला आहे (Upsarpanch received Adarsh ​​Sarpanch award nashik news)

प्रतिसक्षम ग्रामपंचायत व सन्मानित सरपंच यासाठी कार्यरत असलेल्या सरपंच परिषद, मुंबई (महाराष्ट्र)तर्फे पंचायतराजला चांगली दिशा मिळण्यासाठी परिषदेतर्फे उत्कृष्ट काम करणारे सरपंच, ग्रामसेवक, अधिकारी व लोकप्रतिनिधींना पुरस्काराने सन्मानित करण्यात येते.

पद्मश्री पोपटराव पवार यांच्या मार्गदर्शनाखाली सरपंच परिषद राज्यात काम करीत आहे. त्यांचे हे दुसरे वर्ष आहे. सारूळचे उपसरपंच सदानंद बंडोपंत नवले यांचे काम लक्षात घेता सरपंच परिषदेच्या राज्य कार्यकारिणीने त्यांना ‘आदर्श सरपंच’ हा पुरस्कार देण्याचा निर्णय राज्य कार्यकारिणीच्या झालेल्या बैठकीत घेतला.

रविवारी (ता. ३) सकाळी साडेदहाला यशदा (पुणे) येथे या कार्यक्रमास उपस्थित राहून हा पुरस्कार स्वीकारावा, असे रीतसर पत्र त्यांना प्रदेशाध्यक्ष दत्ता काकडे यांनी दिले आहे. यासंदर्भात काकडे यांना विचारले असता त्यांनी सांगितले, की नाशिकमधून १० पुरस्कार जाहीर करण्यात आले आहेत. प्रस्ताव तपासूनच पुरस्कार देण्यात आले. श्री. नवले यांना विचारण्यात आले असता सरपंच म्हणून त्यांनी पुरस्कार देण्याचे सांगितले आहे.

पुरस्कारार्थींमध्ये खळबळ

वास्तविक पाहता पुरस्कार देणाऱ्या समूहाने संबंधित व्यक्तीची योग्य ती खातरजमा करून पुरस्कार देणे आवश्यक आहे. पद्मश्री पोपटराव पवार यांचे राज्यात मोठे नाव आहे. त्यांच्या मार्गदर्शनाखाली हा पुरस्कार देण्यात येतो.

त्यामुळे या पुरस्काराकडे मोठ्या आशेने सर्वजण पाहत असतात. त्यामुळे उपसरपंचांना सरपंच म्हणून आदर्श पुरस्कार देणे ही आश्चर्याची गोष्ट मानली जात आहे. तसेच, रीतसर पत्रही देण्यात आले. त्यामुळे पुरस्कारार्थींमध्ये खळबळ उडाली असून, परिषदेच्या कार्यपद्धतीबाबत आश्‍चर्य व्यक्त होत आहे.