नाशिक : (म्हसरूळ) गोदावरीच्या पात्रात मिसळणारे पाणी शुध्द असल्याचे भास निर्माण करण्याचा प्रयत्न मलजल शुध्दीकरण केंद्राकडून होत आहे. ज्या ठिकाणी हे पाणी गोदावरीच्या पात्रात सोडले जाते. तेथे प्रचंड प्रमाणात फेस तयार होत आहे. या फेसाचा तेथील वनस्पतींनाही फटका बसला आहे.

पाणी शुध्द असल्याचे भास निर्माण करण्याचा प्रयत्न

मलजल शुध्दीकरण केंद्रातून बाहेर पडणारे पाणी हे शुध्द असणे गरजेचे आहे. मात्र, तपोवनातील मलजल शुध्दीकरण केंद्रातून बाहेर पडणाऱ्या पाण्यावर प्रचंड प्रमाणात फेस तयार होतो. या फेसामुळे हे पाणी किती प्रदुषीत आहे याचा अंदाज येतो. गोदापात्रात हे पाणी मिसळण्याअगोदर ज्या ठिकाणी मलजल शुध्दीकरण केंद्रातून बाहेर पडणारे पाणी येते तेथे प्रचंड फेस जमा झालेला दिसतो. या फेसाचा वरचा थर हवेच्या झोतात वर उडतो. आजूबाजूच्या भागातील माती पूर्ण काळी झालेली आहे. येथील वनस्पतींनाही त्याचा फटका बसला आहे. गोदावरीच्या पात्रात हे पाणी सोडण्यात येते त्याठिकाणी या पाण्यावरील फेस वाहत येतो. पात्रातील पाण्यात वाहत येणारा हा फेस तरंगत पुढे जातो. हा फेस नाहिसा करण्यासाठी त्यावर फवारा मारून फेस कमी करण्याचा प्रयत्न करण्याच्या दृष्टीने येथे तुषार सिंचनाचे दोन संच बसविण्यात आलेले आहे, त्यातून वेगाने पडणारे पाणी तो फेस नाहिसा करते. त्यामुळे गोदावरीच्या पात्रात मिसळणारे पाणी शुध्द असल्याचे भास निर्माण करण्याचा प्रयत्न मलजल शुध्दीकरण केंद्राकडून होत आहे.

हेही वाचा > आजी-आजोबांची भेट.. अवघड वळणाचा घाट.. जणू वाट बघत होता तिघांचा काळ

या मलजल शुध्दीकरण केंद्रातून बाहेर पडणाऱ्या या पाण्याची पाहणी पालकमंत्री छगन भुजबळ यांच्यासमवेत जलतज्ञ डॉ. राजेंद्र सिंह यांनी केली. त्यावेळी त्यांनी नाराजी व्यक्त केली. मलजल शुध्दीकरण केंद्रातून बाहेर पडणारे पाणी हे शुध्द आणि निर्मळ असायला पाहिजे. त्याचा फेस व्हायला नको तसेच त्याची दुर्गंधीही सुटायला नको असे त्यांनी मत व्यक्त केले होते. त्यानंतरही येथील पाण्यावरचा फेस कमी झालेला नाही.

हेही वाचा > मरणानंतरही मिळेना मोक्ष... हजारो अस्थीकलश झाडालाच लटकलेल्या अवस्थेत ..कारण वाचून व्हाल थक्क